VM-imut anngunniunneq Pissanganarsiartortoq

Amerikap nunavittaani assammik arsarluni unammersuarnerni Cubami illoqarfiit pingaarnersaanni Havanami pisumi, kalaallit assammik arsartartut arnartaat unamminerminni siullermi Paraguayimut ippassaq unammipput.

Arnat aallartilluaraluarput, tassami nikinnermi 10-9-mik siuaqqagamik, unamminerulli naammassinerani 25-18-imik ajorsarput, Frank Rasmussen, pania unammeqataasoq, Havanamit oqarasuaatikkut oqaluttuarpoq.

Uunamminerup immikkoortuani siullermi arnat unammilluaraluaqalutik unamminerup immikkoortuata aappaanni unammilluarunnaartut, Frank Rasmussenip oqaatigaa.

- Immaqa pissangavallaarnertik imaluunniit immaqa Havanami kiannerujussua pissutigalugu arnat angusarissaanngillat, Frank Rasmussen oqarpoq. Unamminerummi naammassinerani 25-18-imik ajorsarput.

Naatsorsuutigineqareersutulli Paraguayip Kalaallit Nunaat ajorsartikkaa, Frank Rasmussenip qanimut malinnaasup oqaatigaa.

- Sulili sisamariarluta unammeqqittussaavugut, unamminerillu taakkua ilaat ajugaaffigisinnaassasut neriuutigaarput, Frank Rasmussen naggasiivoq.

Kalaallit arnartai pointinnattut

Ullumi maani nalunaaqutarput naapertorlugu ullaap tungaani aqqanermut Nunatta Venezuela unammivaa. 

Unammineq taanna isiginnaartuulluni unammeqataasunullumi pissanganarsimassaaq. Tassami nikinnermi kalaallit unammisartui 13-10-mik siuaqqapput. Mumereernermilu Venezuelarmiut sukataarnerulersimapput 16-inik isertitsillutik kalaallut 13-inik isertitsisut. Unamminerup 26-26 inerneraa.

Pissartat naapileraat

Aqagu Nunatta nalunaaqutaa naapertorlugu ualikkut tallimanut kalaallit Brasiliamiut unammissavaat. Brasiliamiut nunarsuarmi pissartaapput, piviusorsiornerunavianngilarlu kalaallit pointinnannissaannik periarfissaqarnerassallugit.