Per Stig Møller: Pissaanilissuit Kalaallit Nunaat namminersortoq tatissavaat
Namminersortuulernermik nalunaarutiginninneq Kalaallit Nunaannut nunarsuarmiut akornanni immeraannerussaaq Danmarkimullu misigissutsitigut nunarsuarmioqatinullu pissuseqarnikkut annaasaqaataassalluni.
Danmarkimi ukiorpassuarni nunanut allanut tunngasunut ministeriusimasoq Per Stig Møller aviisimi Berlingskemi immikkut ilisimasalittut allaaserisamini taama allappoq .
Per Stig Møllerip Danmark, Kalaallit Nunaat Savalimmiullu nunanut allanut tunngasunut politikkimik tamarmik isumaqataaffigisinnaasaminnik naapiffeqarniaqqullugit kaammattorpai.
- Naalagaaffeqatigiinneq attatiinnarumallugu, Kalaallit Nunaata Danmark Savalimmiullu naligisutut misigisariaqarpai.
Nunat taakkua pingasut tamarmiullutik Naalagaaffeqatigiinneq angerlarsimaffittut misigisariaqarpaat pingasuullutillu naalagaaffeqatigiinneq avissaarnermiit toqqarusunnerusariaqarpaat, taanna allappoq.
Naalagaaffeqatigiikkunnaarnermi toqqarusutassaanngitsoq, politikereq konservatiiviusoq Per Stig Møller, Anders Fogh Rasmussenip naalakkersuisuni siulittaasuunerata nalaani nunanut allanut tunngasunut naalakkersuisuuvoq, isumaqarpoq.
AAMMA ATUARUK Namminersulivinnissaq takujuminaatsippara
AAMMA ATUARUK Torersumik namminiilivikkiartorniartoq
Aviisimi immikkut ilisimasalittut allaaserisami Per Stig Møllerip tikkuarpaa, Sullualukkut aamma Ruslandip kangimut avannaatigut aqqutit ammariartuinnarneranni, Kalaallit Nunaat nunanut pissaanilissuarnut Kinamut, USA-mut Ruslandimullu pingaarutilittut inissisimaleraluttuinnassasoq.
Nunattalu naalagaaffeqatigiit, danskit nunanut allanut tunngasunut sullissiviat illersornissaqarfiallu qimappagit, inuinut ikittunnguanut nunarujussuarmiittunut ulorianarpallaassasoq, Per Stig Møller isumaqarpoq.
- Kina, USA, Ruslandilu tamarmik immikkoorlutik Kalaallit nunaata pissaanilissuarnut arlaannannulluunniit
soqutiginninnerulernissaa pinaveersimatinniassavaat, Per Stig Møller allappoq.
Sikuitsumi avannarlermi sakkutuulersorneq ingasatsikkiartussaaq, taamatullu aamma nunat pissaanilissuit Kalaallit Nunaannut tatinninniarnerat. Immaqa aningaasarsiornikkut immaqaluunniit sakkutooqarnikkut, Per Stig Møller allappoq.
Danmarkip Kalaallit Nunaat nunatut naligisatut pissagaa, Per Stig Møllerip kaammatuutigaa, nunat taakkua marluk nunanut allanut tunngasunut suliaminni tatigeqatigeeqqilerniassammata. Danmarkimmi Kalaallit Nunaat naligisutut piguniuk iluaqutigissagamiuk, Per Stig Møller aviisimi Berlingskemi immikkut ilisimasalittut allaaserisamini taama allappoq.
AAMMA ATUARUK Kielsenip Enoksenip takorluugai upperinngikkai
AAMMA ATUARUK Torersumik namminiilivikkiartorniartoq
