Pisortaq: Kalaallinik sulisoqarniarneq ajornakusoorpoq

Kalaallit assassorlutik sulisartut suliffissaqarfinnut nuuttarneq pikkoriffiginngikkaat oqariartuutigineqarpoq.

- Suliffissarsiorluta nunatta iluani aallartarnissamut sungiussisimanngippallaarpugut, sulisussanik nunani allaneersunik nunatsinnut tikitsitsinerpaasartut ilaata, Permagreenip, pisortaa isumaqarpoq.

Suliffeqarfik sanaartugassanik suliassinneqartartoq Permagreen Kommuneqarfik Sermersuumi suliassamini sulisussanik nunani allaneersunik tikisitsinissamut 2015-imi 20-riarluni qinnuteqarpoq akuerineqarlunilu.

Kommunip Isumaginninnermut, Suliffeqarnermut Inuussutissarsiornermullu Ingerlatsiviata allagaataanik KNR takunnikkumammat akissummi tamanna takuneqarsinnaavoq.

Aamma atuaruk SIK: Sulisussanik tikisitsisoqassanngilaq

Taamaaliornissarli Permagreenip pisortaa, Preben Kold Larsen, naapertorlugu pisariaqarsimavoq.

- Sulisussanik amigaateqaratta allatut ajornaqaaq. Ingammik pisortat suliakkiussaanni uagut suliariumanniffigisatsinni piginnaasat pisariaqartinneqartut amigaatigineqartarput, pisortaq oqarpoq.

Kalaallinik sulisoqarusukkaluartoq

Permagreen nunatsinni tallimani immikkoortortaqarpoq, Nuummilu  pineqaatissinneqarsimasunut inissiisarfiliorneq maannakkorpiaq suliaasa annersaraat.

Naak Kalaallit betonilerisinnaasut ikittuinnaagaluartut, pisortaq kalaallinik sulilersitserusunnerugaluarpoq, ajornaqaarli.

- Sulisinnaasut sungiussisimanngippallaarput oqqassanatik: ‘Suliartorlunga avunngarsinnaavunga. Taavani suliffissaqarpoq’. Kalaallit Nunaanni - allanilumi - soorunami ilaquttat piffissami sivisunerusumi sivikinnerusumiluunniit qimanneqarsimasarput.  Kalaallilli Nunaanni tamatumunnga piareersimanngillat. Sungiusimaneqanngilaq.
Suliffeqarfiup sulisuni kalaalli illoqarfimmi allami suluiassaqalertillutik ilaserisaraluarpai. akulikitsumillu akunnattuungasunnguamik naaggaaginnartarput.

- Taava suliffissaaruttuussanerlutik imaluunniit allamik sulifissaqasanersoq paaseqqaarusarpaat. Nuussinnaasannginneq ajornartorsiutaavoq, Permagreenimi pisortaq oqarpoq.

Sanaartornermili sulisunik nunani allaneersunik atuinerujussuaq pisortat allanngueqataaffigisinnaagaat, Preben Kold Larsen isumaqarpoq.

Tassalu sanaartugassanik siusinaarluarluni pilersaarusiortaraanni, kalaallit assassugasssanik suliaqartut nuttarsinnaanerup iluassusia takusinnaalissavaat.

- Aaqqiissutissat ilagisinnaagaluarpaat, suliassaqarfinnut assigiinngitsunut pilersaarusiorneq, taamaalillunilu sanaartugassat pilersaarusiorlugit, ukiup ingerlaneranik allanngoranngitsumik suliffissaqarniassammat.

Takuneqarsinnaalluniluunniit, sumi siunissami suliffissaqassanersoq. Taava inuit ataasiakkaat siunissartik pilersaarusiorsinnaalissavaat, Preben Kold Larsen oqarpoq.

Aamma atuaruk SIK Sermersoorlu tikkuartaattut