Pisiniarfimmiunngorniat inissarsissunniarpaat

Pisiniarfinni ilinniartut 25it Nuummut atuariartornissaminnut atatillugu kollegiassaaleqinertik pissutigalugu ukiumi ataatsimi atuarannaarallaratarsinnaanerat, Kalaallit Nunaanni Brugsenimit aamma Pisiffimmit uparuartorneqareersorlu Ilinniartitaanermut Ilisimatusarnermullu Naalakkersuisoqarfimmit maanna nalunaarutigieqarpoq, ilinniartut kollegiassaqartinneqassasut.
Niuernermik Ilinniarfik
Niuernermik Ilinniarfik Assi © : KNR
Allattoq Oline I. Olsen
aggustip 08-at 2012 10:08

- Ilinniartut ilinniarnermik ingerlatsereersut inissaqartinnissaat qulakkeerneqassaaq, Ilinniartitaanermut ilisimatusarnermullu naalakkersuisoqarfimmi pisortaq Mikael Kristensen nalunaarpoq.

Niuertarfinnik ingerlatsisut KNI aamma Kalaallit Nunaanni Brugseni sakkortuumik isornartorsiuipput ilinniartut 25it ukioq atuarfiusoq aallartippat kollegiani inissaarukkaluarmata. Arlallit nalunaarfigineqarsimapput namminneq inissarsiortariaqartut.

- Ajornartorsiut tamanna ukiut tamaasa takkuttarpoq kollegiani inissat pagganneqartarmata, Mikael Kristensen nassuiaavoq.

Pisiniarfinni ilinniartut ilinniarnermik ingerlatsereersut inissaqartinnissaat maanna qulakkeerneqareerpoq.

- Kollegiat allattoqarfiat aaqqiissuteqarniarluni ilungersorluni suliniarsimavoq maannalu tassa nalunaarput aaqqissutissamik nassaarlutik, Mikael Kristensen oqarpoq.

Nuummi kollegiani inissaaruttut maanna 85-upput. Kollegiat allattoqarfiata aqutarai kollegiani inissat 613-it ukiumi atuarfiusumi aggersumi atorneqartussat taakkulu ulikkaareerput.

Maanna immikkut aningaasaliisoqarnissaanik qinnuteqartoqarpoq ilinniartut 85-it inissarsissunnissaannut atorneqartussanik.

-Ilinniartut ilinniarnermik ingerlatsereersut soorunami inissamik qulakkeerunneqassapput ilinniarnermi ikerinnakkut unitsitsisoqarsinnaanera pinngitsoorniarlugu, Mikael Kristensen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq