Pisiffik milliardimik kaaviiaartitaqarnini malunnartinniarlugu kaffillertoq
Sinerissami Sparimi Pisiffimmilu pisiniarfinni tamani ullaaq manna nalunaaqutaq arfineq-marlunniit nalunaaqutaq qulit tungaannut kaffeqarlunilu ullaakkorsiutinik sassaalliisoqassaaq, kingornalu pisiniarfinni tamani ualeru nalunaaqutaq ataatsimiit arfernup tungaanut kaffillertoqassalluni.
Pisiffiup illoqarfinni arfinilinni niuertarfinni katillugit 40-ni siorna 2015-imi kaaviiaartitaasa siullerpaamik 1 milliardit koruunit angummagit niuertarfinnik ingerlatsisup Pisiffiup nalliussiniarpaa, taamalu tassa kaffillerniarluni.
- Tulluusimaarutigeqaarput minnerunngitsumillu innimisuttumik qujamasuutigaagut pisisartutta tatiginninnerat uagutsinnut, Pisiffiup pisortaanera Per Steen larsen taama oqarpoq, nangillunilu:
- Aningaasatigut anguniagaq siunniussimasarput Pisiffimmut annertusimaqaaq ukioq 2015-imi, maanna anguarput rekordiliilluta kaaviiaartitatsinnik. Qujarusuppunga pisisartutsinnut aalajaatsunut Qaqortumi, Nuummi, Maniitsumi, Sisimiuni, Aasianni aammalu Ilulissani, aammalu suleqatinnut 650-inut, Per Steen Larsen oqarpoq.
Tassa Sparimi Pisiffimmilu pisisartut tamarmik ullumi kaffillerfigineqarlutillu ullaakkorsiutinik sassaalliiffigineqassapput, nalunaaqutaq arfineq-marlunniit qulit tungaannut, ualerulu ataatsimiit arfernup tungaanut.