Pisassiissutinik agguaassinermi ammasumik ingerlatsinissaq TIG-p ujartoraa

TIG-p aalisarneq pillugu inatsisissatut siunnersuutip oqallisaaqisup tusarniaassutigineqarneranut atatillugu akissutimini Naalakkersuisut aalisagartassiissutinik maannakkut agguaasseriaasiat apeqquserpaa.

TIG tusagassiorfinnut nalunaarummi allappoq aalisarnermut piniarnermullu naalakkersuisup pisassiissutinik aalajangersaanermik agguaassinermillu suliaata matoqqaneruleriartuinnarnera isumalukunnartutut isigalugu.

Tamannalu Transparency International Greenlandip misissuinermi 2012-imeersumi erseqqissaatigereersimavaa.

- Akuersissutinik agguaassinermut piumasaqaatit ersarissut kinaassusersiunngitsullu amigaataanerat misissuinermi tassani  erseqqissaatigineqarpoq. Paragraf 37-ilu naapertorlugu apeqquteqaatit taakkununngalu akissutaasut tamatumunnga iluaqutaasorinngilagut, Anita Hoffer, Transparency International Greenlandimi siulittaasoq taama oqarpoq.

TIG-p ammasumik ingerlatsisoqannginneranik uparuaanerminut Naalakkersuisut paragraf 37 naapertorlugu apeqquteqaammut akissutaat tunngavilersuutigaa. Naalakkersuisut tamatumani allammata "Aalisarnermut sulianut tunngasunut naliliineq suliaavoq, naalakkersuinikkulli aalajangiineq allaavoq."

Naalakkersuisut nutaamik inatsisiliornikkut ajornartorsiut iluarsinavianngilaat

- Kikkut pisassiissutinik tunineqarnerat sunalu tunngavigineqartoq ersarinngippata, taava ammasumik ingerlatsineruallaassanngilaq, tamannaavorlu qularnartutut isigisarput. Isumaqarpugummi kikkut pisassiissutinik tunineqarnersut aammalu suna tunngavigalugu tunineqarnersut ersarissuusariaqartoq. Taamaaliornikkummi naligiissumik agguaassisoqarnersoq tamanit malinnaaffigineqarsinnaassaaq.

Naalakkersuisut aalisarneq pillugu inatsisissatut siunnersuutiminni aalisagartassiissutit siunissami qanoq agguaanneqartarnissaannik nassuiaateqannginnerat TIG-p aamma isumakuluutigaa.

TIG-p siulittaasua naapertorlugu tamannarpiaq pisassiissutit inunnut eqqortunut tunniunneqarnerinut tatiginninnginnermik pilersitsisinnaavoq.

- Tatiginanngissinnaasut tusatsiakkanillu ingerlaartitsisoqarsinnaanera peerlutigit kikkut pisassiissutinik tunineqarnerinut aammalu sooq tunineqarnerinut ammasumik ingerlatsisoqarnissaa isumaginiartigu, Anita Hoffer Transparency International Greenlandimeersoq taama oqarpoq.