Suka K. Frederiksen: Sulinerit tuaviortumik ingerlassinnaasariaqarput

Tunngaviusumik inatsisit peqqissaartumik ilusilersorneqassammata ukiuni marlunni pingasunilluunniit suliarineqassasut, Suka K. Frederiksen AG-mi isumaliutersuutimi allappoq.

Aamma tamat oqartussaaqataanerat pissutigalugu sukkanerpaamik aalajangiisoqaannarsinnaanngitsoq, Suka K. Frederiksenip allaaseraa.

Isumalioqatigiissitamilli pilersitsinissamut siunnersuut Inatsisartunut tuaviuunneqarpoq.

Nassuiaat 100-nik quppernilik, isumalioqatigiissitamut innersuussuteqartoq Inatsisartunut tallimanngormat saqqummiunneqarpoq, siunnersuullu aqaguani siullermeerneqarluni.

Demokraatineersorlu Michael Rosing taamaattoqarnera pillugu Suka K. Frederiksenimut ima aperivoq.

- Naalakkersuisut sukkasuumik suliaqarnissarput imaluunniit peqqissaartumik suliaqarnissarput kissaatigineraat Inatsisinut ataatsimiititaliamut ataatsimiigiannginnitsinni paaserusuppara. Paasisakka naapertorlugit taakku marluk sapaammi ualimi ataatsimi angumerisinnaanngilagut, Michael Rosing oqarpoq.

Inatsisinut ataatsimiititaliaq nalunaarusiamut 100-nik quppernilimmut isumaliutissiissusiornissamut piffissaqarluarniassammat siunnersuutip upernaakkut ataatsimiinnissamut kinguartinneqarnissaa Demokraatit siunnersuutigaat.

Suka K. Frederiksenilli tamanna itigartippaa.

- Pisariaqaraangat sulinerit tuaviortormik ingerlassinnaasariaqarparput, kisianni aamma peqqissaarillugit. Qujanartumik suleriaatit aamma ima ipput, arlaatigut pisoqaraangat, qisuariarnerit pisariaqarsinnaasarput pisarnermiit sukkanerulaartumik ingerlatissallugit, Suka K. Frederiksen oqarpoq.

Ataatsimiititaliarli sulinissaminut periarfissinneqarluanngitsoq, ataatsimiititaliamit tamarmiusumit erseqqissaassutigineqarpoq.

Tamatuma saniatigut suliassap nassuiarnerata, isumalioqatigiissitamullu inuttaliinissap Naalakkersuisunit aalajangerneqarnissaat nassuiaammi Inatsisartut aalajangiisuunissaannik innersuussummut assortuisoq, ataatsimiititaliamit uparuarneqarpoq.

Sulialli pisariaqanngitsumik kinguarsaarneqannginnissaa tunngavilersuutigalugu ataatsimiititaliami amerlanerussuteqartut siunnersuummut tapersiipput.