Pinngortitamik Avatangiisinullu mianerinninneq pillugu nersornaammut kikkut innersuunneqassappat?
Taava immaqa taanna Avatangiisinik Pinngortitamillu Mianerinninneq pillugu Nersornaataanik 2017-imi nersornaaserneqartariaqarpoq. Ukioq manna inuit, kattuffiit suliffeqarfiilluunniit eqqakkanik katersinermik imaluunniit eqqagassaqarnaveersaartitsinermik immikkuullarissumik suliniuteqartut nersornaaserneqassapput. Namminersorlutik Oqartussat tusagassiorfinnut nalunaaruteqarlutik taama allapput.
Naalakkersuisut siulittaasuat aamma pinngortitamut avatangiisinullu naalakkersuisuusoq, Kim Kielsen, nersornaat pillugu ima oqarpoq:
- Nunatsinni pinngortitap avatangiisittalu saligaatsuutinnissaat pingaartippara, ukiorlu manna inuit, kattuffiit suliffeqarfiilluunniit eqqakkanik katersinermik imaluunniit eqqagassaqarnaveersaartitsinermik immikkuullarissumik suliniuteqartut nersornaaserneqarnissaat Naalakkersuisut kissaatigaat.
Taamaammat inummik suliffeqarfimmilluunniit avatangiisit pinngortitarlu pillugit immikkuullarissumik iliuuseqartumik nalunngisaqaruit, taanna Avatangiisinik Pinngortitamillu Mianerinninneq pillugu Nersornaat 2017-imut innersuussinnaavat.
50.000 koruuninik akissarsiassaqartaqarpoq
Nersornaat 50.000 kr-inik aningaasartaqarpoq, inummut ataatsimut arlalinnulluunniit agguataarneqarsinnaalluni.
Siunnersuutit naatsumik tunngavilersugaassaaq, siunnersuummik nassiussisup attaviginissaanut paasissutissat kiisalu inuit, suliffeqarfiit kattuffiilluunniit siunnersuutigineqartut attaviginissaannut paasissutissat ilanngunneqarsimassallutik.
Nunat tamalaat piujuartitsinermik tunngavilimmik atuinermik tunisassiornermillu anguniagaqarnerannut ukioq manna qulequtarineqartoq attuumassuteqarpoq, taamatuttaaq Nunat Avannarliit Avatangiisinut Nersornaataannut qulequtarineqartumut eqqagassartaqanngitsumik aaqqiissutinut attuumassuteqarluni.
