Sulisitsisut: Pinngortitaleriffik saarulliit pillugit ilisimasakippoq
Naalakkersuisut ukioq mannamut saarullittassiissutit 36.500 tonsiussasut sapaatit akunnerata siuliani aalajangerpaat.
Taakkua biologit innersuussinerannut naleqqiullugu pingasoriaammik amerlanerupput.
Biologilli taama siunnersuisinnaanissaminnut ilisimasaat naammanngitsut, Henrik Leth isumaqarpoq.
- Nanortalimmiit Upernaviup avannaanut misissuinerit naammassineqarsimasut najoqqutaralugit pisassiissuteqartoqarsinnaanngitsoq isumaqarpunga, Henrik Leth KNR-imut oqarpoq.
Pinngortitaleriffik Nunatta kitaata avataani taavalu Nuup Sisimiullu sineriaasa qanittuani misissuisimavoq, Pinngortitaleriffimilu aalisakkat qaleruallillu pillugit immikkoortortaqarfianni ningiu Helle Siegstad isumaqarpoq, misissukkatik atorluarneqarsinnaasut.
- Saarulleqassutsimut misissuinerit uku eqqortumik tikkuussisuusut isumaqarpugut. Misissuinerimmi takutippaat saarulliit nutaat qanga suffiaanermeersuusut, saarulliillu mikinerit aalisarneqarsinnaangajalersut qassiunersut, Helle Siegstad KNR-imut oqarpoq.
Amerlanerusunilli innersuussuteqannginera Henrik Lethip tupigivaa, Nunattami imartaani saarulleqarluarnera aalisartortatta nalunaarutigisarpaat.
- Tunumi aalisaraangatta saarullippassuaqartarpoq, Pinngortitaleriffiulli umiarsuaat Paamiut, ilisimatuulluunniit umiarsuaat Walter-Hervig misissuigaangata, saarulleqarneq ajorpoq, Henrik Leth oqarpoq.
Maannakorpiarlu saarulleqarluarnera ilumoortuusoq Helle Siegstadip oqaatigaa.
- Saarulleqarluarnera ilisimalluarparput. Kisianni saarulliit nutaat aalisarneqarsinnaalertussat ikinnerupput, tamannalu saarulliit amerlassusaannut siunissami sunniuteqassaaq, Helle Siegstad oqarpoq.
Saarulleqassutsimut misissuinertik ukioq manna annertusarniarlugit Pinngortitaleriffiup paasissutissiissutigaa.