Piniartut naalakkersuisunit immikkut ikiorserusunneqarput

decembarip 22-at 2004 17:18

Nunatsinni piniartut Namminersornerullutik Oqartussanit 5000 koruuninik taperneqarnissaannik KNAPK-p qinnuteqaataa naalakkersuisut akueraat, akuersinertillu aningaasaqarnermut ataatsimiititaliamut ingerlateqqippaat.

Aningaasaqarnermut ataatsimiititaliami siulittaasoq Simon Olsen radioaviisimut oqarpoq naalakkersuisut saaffiginnissutaat takkunniariarpat suliaq suliaralugu aallartinneqassasoq, oqaatigisinnaangilaali akuerineqassanersoq akuerineqassannginnersorluunniit.

Aalisarnermulli naalakkersuisup Rasmus Frederiksenip radioaviisimut oqaatigaa suliat taamaattut sukkasuumik ingerlasarmata ilimanarluarsinnaasoq piaarnerpaamik piniartut checkinnatinneqassanersut paasineqassasoq.

Rasmus Frederiksen aamma oqarpoq piniartut amerlanerit nunaqarfinneersut ikittunnguillu illoqarfinneersut aningaasanik tunineqassasut.

Qaanaami Upernavimmi tunumilu piniartut piniagassarliornermik eqqugaapput.

Namminersornerullutik Oqartussani pisortaaneq Kaj Kleist radioaviisimut oqarpoq aqagu ulloq aamma suliffiummat, qularnanngitsoq aqagu akuerineqariaannaasoq, taamaalillunilu juullertinnagu piniartut pissarsitinneqassasut.

Naalakkersuisut erseqqissaatigaat piniartut siunissami ikiorneqartarnissaat eqqarsaatigalugu ataatsimiititaliortoqassasoq susassaqartunillu ilaasortaqassasoq.

Ukioq kingulleq immikkut ikiorsiissuteqarnissamik piniartut qinnuteqaataat naalakkersuisunit akuerineqanngilaq.