Piniarneq: Nakkutilliisut suliassatik nammassinnaanngikkaat
Hans Mølgaard 1990-imi nunatsinni piniarnermut nakkutilliisoqartitsisoqalermalli atorfinippoq. Nunarujussuaq umimmanniarfiusartoq aavarfigineqartartorlu ukiorpassuanngortuni tamakkerlugu nakkutilliiffigiuminaatsittarpaa.
- Kangerlussuup eqqaa ajoraluartumik akuttusuumik takuniartarparput. Nalunngilarpulli akulikinnerujussuarmik takusariaqaraluarlugu, Hans Mølgaard KNR-imut oqarpoq.
Nakkutilliisut ukiorpassuanngortuni kissaatigisarsimagaluarpaat Kangerlussuaq aavarfiup nalaani aalajangersimasumik nakkutilliisoqalissasoq.
- Kisianni ajoraluartumik ulloq manna tikillugu angusaqanngilagut, aamma aningaasat aporfigineqartartut nalunngilarput, Mølgaard oqarpoq.
Nunatsinni nakkutilliisut massakkut 11-upput 1998-imilu amerlanerpaagamik 17-ullutik. Nakkutilliisut nuna isorartuumik, soorlu Upernavimmi nakkutilliisut marluk nuna 370 kilometerisut isorartutigisoq, Englandisullu angitigisoq nakkutilliiffigaat. Taamaanneralu allanngortikkuminaappoq.
Qanoruup sammisaq pillugu ilanngutassiaa ataani takuuk:
