Assi: Kriminalforsorgen i Grønland

Pisortaq: Pinerluttunik isumaginnittoqarfik pillugu isumaqatigiissummi nunarput ilaatinneqanngilaq

Nunatsinni pinerluttunik isumaginnittoqarfiup pisortaata Folketingip kalaallit pinerluuteqarsimasunut inissiisarfiini immikkut aningaasanik immikkoortitsisimannginnera tusaatissatut tiguaa. Danskillu naalakkersuisuinit eqqartuussisoqarnermi aningaasaliisoqarnissaa neriutigiinnarpaa.

- Isumaqatigiinnermi najuutinngilanga, suna oqaluuserineqarsimanersoq naluara. Kisianni inerniliissutigisinnaavara pinerluuteqarsimasunut isumaginnittoqarfimmut aningaasaliinerunissaq salliunneqarsimanngitsoq, tamanna tusaatissatut tigussavara.

Folketingip ukiunut sisamanut tulliuttunut sapaatip akunnerata siuliani amerlanerussuteqarlutik isumaqatigiissutaat pillugu nunatsinni pinerluttunik isumaginnittoqarfiup pisortaa, Naaja H. NAthanielsen taama oqarpoq.

AAMMA ATUARUK Herstedvesterimiittunut akeqanngitsumik angalasarnerit atorunnaarsinneqartut

Naak kalaallit folketingimut ilaasortaatitaat kissaaterpassuaqaraluartut isumaqatigiissut nunatsinni pinerluttunik isumaginnittoqarfimmut aningaasanik atugassanik ilaqanngilaq.

Sulisunut sillimaniarneq sammineqartoq

Taamaakkaluartorli isumaqatigiissut ajunngitsunik maluginiagassartaqartoq Naaja H. Nathanielsen isumaqarpoq.

- Ilaatigut sulisut ineriartortinneqarnissaat sillimaniarnerlu pingaartinneqarput. Naak isumaqatigiissummi uagut pineqanngikkaluarluta taakku nunatsinni isummersuutitut atorsinnaavagut.

Taamaammat danskit naalakkersuisuisa 2018-imut inatsisissaatut siunnersuutaani ilaatinneqartutut aningaasat 40 mio. koruunit atorlugit danskit naalakkersuisui Namminersorlutik Oqartussallu pinerluuteqarsimasunut inissiisarfinni sulisut ineriartortinneqarnissaat sillimaniarnerullu pitsaanerulersinnissa pillugu aningaasassarsiornissaat neriutigaa.

AAMMA ATUARUK Eqqartuussiveqarfiit 40 mio. koruuninik aningaasaliiffigineqarput

- Uagut kissaatigut nassiunnikuuavut, tamatumanilu sulisut ilinniarnissaat ilinniaqqinnissaallu uagut pingaartipparput. Tamatuma aningaasaliiffigineqarnissaa neriuutigingaarparput.

Ilinniaqqinnissat aningaasassaqannginnerat pissutigalugu arrinnerussasut

Kissaatigisalli tamarmik eqquutsinneqassagunik eqqartuussiveqarnermut aningaasaliissutit 40 mio. koruuniusut nungoreerput.

AAMMA ATUARUK Illersuisut amigaatigineqarnerat annertusissagunartoq

AAMMA ATUARUK Eqqartuussiveqarnermut aningaasaliissutit ikippallaartut

Taamaakkaluartorli nunatsinni pinerluuteqarsimasunut inissiisarfinni pisortaasa sulisut akornanni sillimaniarneq ilinniaqqinnissallu pissasut aalajangersimavaat.

Tamannani danskit naalagaaffianit aningaasaliisoqannginnerani arriinngerusumik pissasoq, pisortap oqaatigaa.

- Ilaanit illuartitsiinnartariaqassanerput qularnanngilaq. Ilinniarneq akeqarpoq, pingaartumik nunatsinni. Ilinniartitsisutta angalatinnissaat akeqarpoq. Taamaammat tamatuma arriitsumik ingerlanissaa qularnanngilaq.

AAMMA ATUARUK Aaja Chemnitzip isumaqatigiissut nutaaq isornartorsioraa

Socialdemokraatinit isumaqatigiissummut tapersiisimasoq eqqartuussiveqarneq pillugu oqaaseqartartoq, Trine Brahmsen KNR-imut allappoq:

- Socialdemokraatit Kalaallit Nunaanni Danmarkimilu inissiisarfinni sulisut ilinniartinneqarnissaanut aningaasanik atuerusukkaluarput. Tamannali taperserneqanngilaq - uagummi inatsiseqarnermut ministereqarfimmiinngilagut - taamaammat parnaarussivinni pinerluuteqarnerusimasunut (Danmarkimi aaqq.) sulisut amerlanerulernissaat ukkatarineqarpoq.

KNR-ip danskit inatsiseqarnermut ministeriata, Søren Pape Poulsenip (K) kiisalu inatsiseqarnermut naalakkersuisup, Sara Olsvigip (IA) oqaaseqarnissaat utaqqivai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!