Angut inuusuttoq Københavnimi februaarip 14-iani 15-ianilu pinerliisoqarneranut peqataasimasutut unnerluutigineqarluni politiinit ullumi tallimanngornermi ullaap tungaani tigusarineqarpoq.
Danmarkimi nalunaaqutaq 10.35 missaani tigusarinninneq pivoq.
Angut inuusuttoq aqagu arfininngornermi inatsit tunngaviusoq naapertorlugu aqagu arfininngornermi killisiorneqassasoq, Københavnimi Politiit tusagassiorfinnut nalunaaruteqarlutik taama ilisimatitsipput.
Pinerliisutut pasineqartup qatanngutaa
DR Nyheder naapertorlugu, angut tigusarineqartoq 18-inik ukioqarpoq, Københavnimi Mjølnerparkenimi najugaqarluni pinerliisutullu pasineqartumut qatanngutaalluni.
Matut matoqqatinneqarnissaannik aammalu atianik isertuussinissamik unnerluussisussaatitaasut piumasaqaateqarniarput.
AAMMA ATUARUK Pinerluttup ingerlaneranit nalunngisagut
Suliaq politiinit annertunerusumik oqaaseqarfigiumanngilaat, nutaarsiassaqartitsivimmulli Ritzaumut oqaatigalugu inatsit tunngaviusoq naapertorlugu killisiuinissaq nalunaaqutaq qassinut sumilu pissanersoq ullumi tallimanngornermi kingusinnerusukkut tusarliunneqarumaartoq.
Pinerliisimasutut pasineqartup, Omar El-Husseinip, arfininngornermi februaarip 14-iani ualigaa, Østerbromi Krudttøndenimi oqallinnermik aaqqissuussinermut saassussivoq, filmiliornermilu ilitsersuisartoq 55-inik ukiuklik Finn Nørgaard aallaaneqarluni toqutaalluni.
Politiit naapertorlugit, pinerliisoq kingorna Nørrebrogademi internettertarfiliarpoq, aqaguanilu sapaammi Københavnimi qiterpasissuani Krystalgademi juutit naalaffiannut saassussivoq, 37-nillu ukiulik Dan Uzan aallaallugu toqullugu.
Saassussinerni marluusuni politiit tallimat ikiligaapput.
Omar Abdel Hamid El-Hussein Nørrebro Stationip eqqaani Svanevej 1-imi inissiap saavani sapaammi ullaaralaakkut politiinit aallaaneqarluni toqutaavoq.
Angutit allat marluk Omar Abdel Hamid El-Husseinimik ikiuisimasutut aamma politiinit unnerluutigineqarsimapput.
AAMMA ATUARUK Angutit marluk unnerluutigineqartut: Pinerliiniaq sakkussarsisimagaat
Taakku, maanna tigummineqarallarput, Omar Abdel El-Husseinillu saassussereernerata kingorna aallaasineq toqqorsisimasutut aammalu qimaaffissaanik ikuisimasutut unnerluutigineqarlutik, pinerluttulerinermili inatsimmi pinerliiat pillugit aalajangersakkat naapertorlugit unnerluutigineqanngillat.
Tigummigallarneqarnerat ippassaq sisamanngornermi sapaatit-akunnerinik sisamanik sivitsorneqarpoq.
Angutit aallaasersorluni pinerliisoqarnerata aqaguani tigusarineqartut pinngitsuunerarput.
Sisamanngormat eqqartuussisoqarnera sillimaniarnikkut annertuumik piareersaateqarfiuvoq, Københavns Byret politeerpaalunnit nakkutigineqarluni.
Politiit siornatigut paasissutissiissutigaat misissuisartut 200-t suliamut atatillugu sulisinneqartut.
/ritzau/
