Ataatsimiititaliaq: Pineqaatissinneqarsimasut Nuummut nuunnertik peqqissimissutigisinnaassavaat
Inatsisartuni inatsisinut ataatsimiititaliaq taama isumaqarpoq, Herstedsvesterimilu parnaarussivimmiittut kalaallit immikkut ittumik sullinneqarnissaat kissaatigaat.
Københavnip avataani Herstedvesterimi parnaarussivimmiittussanngorlugit eqqartuunneqarsimasut Nuummut pineqaatissinneqarsimasunut inissiisarfittaassamut nuutinneqarnissaminnik toqqaasimasut peqqissimissuteqarsinnaassapput.
Inatsisartut inatsisinut ataatsimiititaliaat ataatsimiititaliap oqaaseqaataani allappoq.
Politikerit taamaalillutik Danmarkimi Inatsiseqarnermut ministereqarfiup inatsisissatut siunnersuutaat, kalaallit pineqaatissinneqarsimasut Nuummut nuutinneqarnerminni peqqissimisinnaannginneranik imaqartoq akerleraat.
AAMMA ATUARUK Herstedvesterimi isertitat pillaatissartik sumi atussanerlugu nammineq toqqassavaat
Inatsisinut ataatsimiititaliap inuit pisinnaatitaaffiinut suliniuteqartut innersuussutaat malippaa
Peqqissimissuteqarsinnaanermut pisinnaatitaaffeqarneq Danmarkimi pisinnaatitaaffiit pillugit suliniaqatigiiffiup siullermik siunnersuutigaa, kingornalu Kalaallit Nunaanni inuit pisinnaatitaaffiit pillugit siunnersuisoqatigiit tapersiipput.
Kalaallit pineqaatissinneqarsimasut inissinneqartarnerat pillugu inatsisissatut siunnersuut Inatsisartuni sisamanngormat aappassaaneerneqarlunilu naggataarneqarpoq, siunnersuullu peqqissimissuteqarsinnaanermik ilaqarpoq.
Suliaq Folketingimi kingorna suliareqqitassanngussaaq.
AAMMA ATUARUK Herstedvesterimut utersinnaatitaanissamut pissutsit immikkut ittut atuuttariaqassapput
Folketingimi peqqissimissuteqarsinnaatitaanissamut siunnersuut assigiinngitsunik qisuariarfigineqareerpoq. Folketingimut ilaasortap, Aaja Chemnitz Larsenip Inuit Ataqatigiinneersup peqqissimissuteqarsinnaatiaanissaq immikkut illuinnartuni atorneqarsinnaanissaa KNR-imut februaarip qaammataani oqaatigaa:
- Aamma Herstedvesterimit Nuummut nuunneqarnissaq toqqaraanni tamanna tunngaviatigut inaarutaasumik aalajangiinerusariaqarpoq. Taamatullu aalajangerneq eqqarsaatigilluagaasimasariaqarpoq.
Socialdemokraatit Kalaallit Nunaannut tunngasumik oqaaseqartartuata, Karin Gaardstedip siunnersuut ukioq itigartitsissutigaa, Konservative Folkepartimiillu kalaallit nunaannut tunngasumik oqaaseqartartup, Rasmus Jarlovip peqqissimissuteqarsinnaatitaaneq piffissami sivikitsuinnarmi atuunnissaa ammaffigalugu oqaatigaa:
- Kalaallit nunaminni pillaatiminnik atuisinnaanissaat piffissaq ungasinnerusoq eqqarsaatigalugu siunertaavoq. Tamanna pissusissamisoorlunilu naleqqunnerpaavoq.
Herstedvesterimi kalaallinut kiffartuussineerutissasoq
Inatsisartut Inatsisinut ataatsimiititaliaa immikkoortup aappaani Inatsiseqarnermut ministereqarfiup siunnersuutaanut aamma akerliuvoq.
Inatsisinummi ataatsimiititaq danskit naalakkersuisuisa isumaata akerlerluinnaanik isumaqarpoq – tassa kalaallinut pineqaatissinneqarsimasunut Herstedvesterimiiginnarusuttunut immikkut ittunik neqerooruteqartoqaannassasoq.
Tassani assersuutigalugu kalaallisut ilinniartitsineq, erinarsoqatigiit, kalaallisut naalagiarneq kalaallillu inuussutissaataannik nerisaqartinneqarneq pineqarput.
Inatsiseqarnermut ministereqarfik aalajangiisussaaguni neqeroorutit taakku Nuummi pineqaatissinneqarsimasunut inissiisarfiup ammarneraniit ukiut marlunngorpata unitsinneqassapput.
AAMMA ATUARUK Parnaarussat Herstedvesteri Nuummit piumanerugaat
