Oquk Pineqaatissinneqarsimasunut inissiisarfik ammartoq matusorlu
Sumiiffiinni taakkunani marlunni oqunneri peqqutaallutik inissiisarfimmiittut allamut nuutsinneqarsimapput. Qaqortumiittup illutaata oqunnera paasineqarneraniilli ukioq ataaseq sinnerlugu nutarterneqareersorlu Pinerluttunik Isumaginnittoqarfiup ataasinngormat tigoqqippaa.
Sisimiunili pineqaatissinneqarsimasunut inissiisarfik taama ajortigisumik oqunngilaq. Inissiisarfimmiittut apriilip qaammataa naalersoq nuukkallarput pilersaarutillu taamaaginnassapata maajip naanerani uteqqissasut, Pinerluttunik Isumaginnittoqarfiup pisortaa, Naaja Nathanielsen oqarpoq.
- Oquup pinngorfia paasineqarmat immikkoortortaqarfik taanna matoqqaarparput, nutarterinerlu aallartimmat pineqaatissinneqarsimasunut inissiisarfik tamaat matuvarput, Naaja Nathanielsen oqaroq.
Pisortap oqaatigaa, inissiisarfinniit nunatsinni pineqaatissinneqarsimasunut inissiisarfinnut allanut nuutsinneqarsimasut Qaqortumut Sisimiunulluunniit uteqqikkusunnerlutik namminneq aalajangersinnaagaat.
- Ilisimasakka naapertorlugit Qaqortumut uteqqinnissaq tamarmik aalajangersimavaat, Nathanielsen oqarpoq.