Pinaveersaartitsinermut aningaasaliisoqaqqinnissaa siunnersuutigineqarpoq

Pinaveersaartitsinermut suliniutit, tassa angajoqqaanngortussanut suliniut taaguuteqartoq MANU 6 millionit koruunit meeqqanut inunngujaarsimasunut, nakorsiartarfimmi peqqissaasunik ineriartortitsinissamut suliniutillu MANUp allinissaanut atorneqartussatut immikkoortinneqassasut Naalakkersuisunit siunnersuutigineqarput.

Tamannalu angajoqqaanngortussanut ilinniartitsisarfimmi iluarisimaarneqarpoq.

- Ilassilluaqaara, nuanneqaarlu, suliniummut aqutsisoq Rikke Louise Kuhn oqarpoq.

AAMMA ATUARUK Naalakkersuisut aningaasaqarnermut politikkerissaarput - uagut politikkerput

Suliniut MANU tassaavoq angajoqqaanngortussanut tamanut piareersarnissamik aamma naalungiarsuup qaammatinik arfineq-pingasunik qaammateqalernissaata tungaanut qanoq pineqarnissaanik aqqutissiuussivik. 

 - Anaananngortussaq naartulerluni, taava aappanilu juumuumukarnerminni  angajoqqaanngornissamut piareersarnissamut neqeroorfigineqassapput.

Tassa inersimasut perorsaaneranni aqqutissiuunnissaannut neqeroorutaavoq, Rikke Louise Kuhn oqarpoq.

Meeraaqqammi inunngornerminniit toqqissisimanartunik avatangiiseqartinneqarunik siunissami inuunerminni ikorfartuutigilluarsinnaammassuk.

- Meeqqat inuusuttullu toqqissisimanartumik alliartortut ilikkarniarnissartik ajornannginnerutittarpaat.

Taakkulu aamma ilinniagaqalertarput imminnullu naleqartinnerusarlutik, Rikke Louise Kuhn oqarpoq.

Siusinaartumilli iliuuseqartarnissap aamma inuiaqatigiit aningaasaqarnerannut iluaqutaasinnaasorineqarpoq.

Tassami meeqqat toqqissisimasumik peroriartorsimasut siunissami napparsimanissamut aamma atornerluisunngornissamut ilimanaateqannginnerusarput.

AAMMA ATUARUK Sulinermut ilanngaat isertitakkaanit aningaasalersorneqarsinnaasoq

- Inuiaqatigiinni aningaasaqarneq eqqarsaatigalugu pinaveersaartitsinerup iluani iliuuseqarnissaq pingaaruteqarpoq. Taamaammallu meeqqat inuusuttullu eqqarsaatigalugit MANU tapertaalluarpoq, Rikke Louise Kuhn oqarpoq.

Suliniut MANU nunarput tamakkerlugu atorneqarpoq. Annertunerulersissallugulu suliniutit ingerlanneqarpoq, tassa inoorlaat arfineq-pingasunik qaammateqalernissaat tikillugit angajoqqaanngorlaat siunnersorneqarsinnaanerat meeqqat marlunnik ukioqalernissaanut sivitsorniarneqarluni.