Pilersaarusiap akiitsut ikilisissavai
Namminersorlutik Oqartussat kommunillu akiliisitsiniarnermut pikkorinnerulersinnaasut, kukkunersiuisut Danmarkimeersut BDO-p nalunaarusiaanni allaqqavoq.
Siornatigornit akiliisitsiniartarnerup ajunnginnerusumik ingerlasinnaanera, akileraartarnermut aqutsisoqarfimmit aamma oqaatigineqarpoq.
- Suleqatigullu, tassaanerusut kommunit sisamat, Nukissiorfiit INI-lu, suliagut uteqattaartinnginnissaannut pikkorinnerulersinnaajuuaannarpugut, Akileraartarnermut aqutsisoqarfimmi pisortaq Kim Neumann oqarpoq.
Aamma atuaruk Pisortanut akiitsut amerliartupiloortut
Pisortanut akiitsut amerlinerannut pisortat aamma akisussaaffeqartut, kukkunersiusartut Danmarkimeersut, BDO-p nalunaarusianni ilaatigut inerniliunneqarpoq.
Akiitsullu ikilisarniarlugit kommunini borgmesterit, suliffeqarfiit naalakkersuisullu februaarip aallaqqaataaniit atuutilersumik pilersaarusioreerput.
Suliat akileraartarnermut allaffeqarfimmit suliarineqartut assigiiaarnerulernissaat piginnaassuseqarnerusumillu suliarineqarnissaat, akiitsoqalersitsinaveersaarnermullu suliaqarnerulernissaq, pilersaarusiami anguniakkatut ilaatigut allaqqapput.
Aamma atuaruk Sermersuumi Qaasuitsumilu akiitsut amerlanersaapput
Akiliisitsinissamut aaqqissuussamik, Ilanngaasivimmik taaguuteqartumik, aamma atuutsitsilernissaq sulissutigineqarpoq. Taanna Kiffaq - kontumut assingungajappoq, tassami akiliisussap akissarsinnginnermini kontuanit akiligassat ilanngaassutigineqartarnissaat aamma siunertaqarami.
Aamma atuaruk IA: Kiffaq-konto atuutsinneqalerli
Kommunilli ikiuisinnaasut, KANUKOKA-mili pisortaq Hans Peder Barlach Christensen isumaqarpoq.
- Kommunit isertitsiniaanermut akisussaaffik tigumminngilaat. Kisianni kommunit peqataaffigisaannik arlaatigut isertitsiniaanermut eqaannerusumik sukkanerusumillu aaqqissuussivigineqarnissaa, kommunininngaanniit ammaffigaarput, Hans-Peder Barlach Christensen oqarpoq.
Pilersaarusiami siunnersuutigineqartut piviusunngortinnissai sulissutigineqartut, qaquguli tamakkerlugit piviusunngussanersut ilisimaneqanngitsoq, Akileraartarnermut aqutsisoqarfik ilisimatitsivoq.
