Ph.D.-nngorniutimik Ilinniartitsinermik Ilisimatusarfimmi siullerpaamik ullumi illersuisoqassaaq

Tassami cand.mag. Anders Øgaardip, ilinniarfik najornagu ilinniartitsineq, qallunaatut fjernundervisningimik pisagaannik, pillugu Ph.D.-nngorniutini illersussagamiuk. Suliaata taaguutaa tassaavoq "Fjernundervisning i skolen i Grønland".

Nunatsinni ilinniartitsisussaaleqisoqartarnera takornartanngilaq, pingaartumik nunaqarfinni, taamaattumik ilinniarfik najornagu ilinniartitsineq periarfissatsialaavoq.

Ilinniarfilli najornagu ilinniartitsinermi internetikkut attaveqarneq kisimi pingaaruteqaannanngilaq, ilinniarfilli najornagu ilinniartitsineq annertunerusumik atorniaraanni aamma aaqqissulluagaasariaqartoq Anders Øgaardip Ph.D.-nngorniutimini pingaarnertut oqaatigaa:

- Ilinniarfik najornagu ilinniartitsineq aqqutigalugu perorsaariaatsip atuartitsinerullu ineriartortinneqarnissaa sulianni ersersinniarsaraara, Meeqqat atuarfiannut inatsimmi anguniakkani naammassineqarsinnaaniassammat, nalinginnaasumik atuartitsineq ilaaginnarlugulusooq ingerlasoqannginniassammat, Anders Øgaard oqarpoq.

Ilinniarfik najornagu ilinniartitsineq nunatsinni periarfissatsialattut isigineqartoq taanna isumaqarpoq. Assersuutigalugumi interneti aqqutigalugu ungasianit atuartitsineq atuartunut piumasaqaatitaqartoq, Anders Øgaard oqarpoq:

- Inip atuartitsiffiusup nalinginnaasup iluani atuartitsisoqartoq atuartut akuerisarpaat, naak immaqa annerusumik malinnaanngikkaluarlutik. Ilinniarfilli najornagu ilinniartitsisoqassappat ilinniartitsisunut atuartunullu piumasaqaatitaqarpoq, atuartutummi misigissagunik malinnaalluartariaqarput, Anders Øgaard oqarpoq.

Anders Øgaard, Ph.D.-nngorniutiminik Ilimmarfiup auditoriaani ullumi nalunaaqutaq ataatsimiit sisamat tungaannut illersuissaaq, illersuinerlu tamanut ammavoq tikilluaqqusaallutillu.