Naalakkersuisut: Perorsaasut akissarsiaat qaffanneqartariaqartut

Perorsaasullu aningaasarsiaat naleqqussarneqartariaqartut, aningaasaqarnermut naalakkersuisumit nalilerneqarpoq. Aningaasarsiallumi aaqqiivigineqartariaqartut Inatsisartuni partiit annersaat marluk aamma isumaqarput.

Ilinniarsimasunilli amigaateqarput. Perorsaasutummi ilinniarsimasorpassuugaluit aningaasarsiaat annikippallaarmata, perorsaasut ilai meeraaqqerivinni meeqqerivinnilu sulerusunneq ajorput.

Tamanna allanngortikkusullugu Siumut sinnerlugu inatsisartuni ilaasortat perorsaasut ilinniartitsisutulli peqqissaasutulluunniit aningaasarsiaqalernissaat piumasaraat.

-Tamarmik bacheloruddannelseupput, ilaa ilinniarfiupput. Taavalu aamma ukiut sisamassaa qiteqqullugu ilinniarfiulluni, taamaattumik aamma isumaqarpunga soorunami taamatut aamma allatulli ilinniagaqarsimasutut aamma aningaasarsiaqartariaqartut, Inatsisartunut ilaasortaq Martha Lund Olsen (S) oqarpoq.

Taamatuttaaq Inuit Ataqatigiinniit isummerput.

-Pædagogit naleqassusaat inuiaqatigiinni qaffasinnerusariaqarpoq, Inatsisartunut ilaasortaq Bendt B. Kristiansen (IA) oqarpoq.

Aningaasaqarnermut Naalakkersuisup perorsaasut aningaasarsiai aamma naleqqussartariaqarsorai.  

-Tassa naalakkersuinikkut anguniagaagami perorsaasutullu aningaasarsiallit aamma suliffiit assersuuneqarsinnaasut allat pitsanngorsarneqarnissaat, taavalu aamma akit qaffakkiartorneranut naleqqunnerusumik akissaasersuisoqarnissaq taanna pisariaqassasoq. Taamaammat isumaqatigivakka tassa naleqqussaasoqartariaqarpoq siunissami, Aningaasaqarnermut Naalakkersuisoq Aqqaluaq B. Egede (IA) oqarpoq.

Inuit Ataqatigiinniit perorsaasussaaleqineq immikkut iliuuseqarluni aaqqiiviginiagassaasutut nalilerpaat.

-Isumaqatiginninniutitut piumasaqarpugut 2018-imi aningaasanut inatsisissap  suliarineranut perorsaasunik piffik qimannagu ilinniartitsinissaq aningaasalerneqassasoq aammalu perorsaasut ilinniaqqinnissaanut aamma aningaasanik immikkoortitsisoqassasoq, taanna piumasarivarput,  Inatsisartunut ilaasortaq Bendt B. Kristiansen (IA) oqarpoq.

Ukiorpassuanngulersuni perorsaasut aningaasarsiaasa qaffanniarneranut aporfeqartarneq allanngortinniarlugu, aningaasaqarnermut naalakkersuisup iliuusissamik nutaamik eqqarsaatersuuteqarpoq.

-Tassa siunissami isumaqatiginninniartitseriaaseq taamatut ingerlaanassava? Imaluunniit allanngortittariaqarpa? Tassa uanga massakkut aningaasaqanermut naalakkersuisutut pingaartippara siunissami inuiaqatigiit aningaasarsiornikkut atugarissaarnerulissappata, taavalu aamma naligiinnginneq inuiaqatigiit akornanni millisarneqassappat, aamma akissaasersiuinerit nutaat aamma isummerfigisariaqartartussaasagamik. Taamaammat tassani isumaqatiginninniarnermi ilusiliisimaneq aamma siunissami immaqa sinaakutissanik aalajangersimanerusunik sammiveqarnissaa pisariaqassasorivara, Aningaasaqarnermut Naalakkersuisoq Aqqaluaq B. Egede (IA) oqarpoq.   
       

AAMMA ATUARUK Perorsaasussaaleqineq sanngiinnernik eqquivoq

AAMMA ATUARUK Pædagogmangel er landsdækkende problem