Perorsaasussaaleqineq meeqqanut eqquinerluttoq

Perorsaasut atorfissaqartinneqartut marluugaangata aappaa inuttassaqartinneqarneq ajortoq taavalu aamma meeqqerinermi isumaginninnermilu ikiortit pingasut atorfissaqartinneqarpata marluinnaat inuttassaqartinneqartut kommunalbestyrelsimut paasissutissiissummi atuarneqarsinnaavoq.

- Kommunillu meeqqeriviini arlalinni ilinniarsimasunik sulisoqarnissamik ajornartorsiuteqarnerup nassataraa, pitsaassutimik piumasaqaatinut naapertorlugit angummassinnaajunnaarnerit annertuut. Kommunalbestyrelsip ullumi ataatsimiinnissaanut paasissutissiissummi taama allassimavoq.

AAMMA ATUARUK Perorsaasut: Politikerit Danmarkimit ikioqqusariaqaraluarput

Paarlatsissaaleqisoqarpoq

Perorsaasunik ilinniarsimasunik amigaateqarneq paaqqinnittarfinnuinnaq unammillernartuunngilaq. Sulisussaaleqisoqarneranimi napparsimasoqartillugu paarlatsissaaleqineq aamma ajornartorsiutaavoq. Napparsimasoqartillugulu sulisut artukkerneqarsinnaasarlutik.

Meeqqanut suli atualinngitsunut perorsaanikkut inerikkiartuutaasumik ulluunerani paaqqinnittarfinnik kommunit neqerooruteqarnissaannik inatsit, kommunip naammassisinnaanagu aamma nassuerutigaa.

Ilinniarsimasut ikippallaarput

Nunatsinni perorsaasut ilinniarsimasut ikippallaarneri ajornartorsiummut peqqutaaqataasoq kommunimi atorfilittat naqissuserpaat.

Perorsaanermik ilinniarfimmi Ilulissaniittumi ilinniakkaminnik naammassinnittartut amigaatigineqartunit ikinnerusarmata, perorsaasunik amigaateqarneq sivitsortumik ajornartorsiutaavoq.

Ilinniakkamik naammasinnittut ukiumut 20-t missaaniittarput.

AAMMA ATUARUK Qaqortumi perorsaasunngorniarfiup matuinnarnissaa isumaliutigineqartoq

Taamaammat kommunip meeqqanut atuarfeqarnermullu ingerlatsiviup perorsaasunik ilinniarsimasunik Danmarkimiit tikisitsisalernissaq eqqarsaatersuutigaa.

Atorfiit inuttassarsiukkat atorfimmut atatillugu ineqarnissamik neqeroorutitalerlugit kommunip misilissimagaluarpaa. Iluaqutaasimanngilarli.