Peqquserlunnerit amerleriarujussuartut

Naatsorsueqqissaartarfiup kisitsisaataani nutaani atuarneqarsinnaavoq 2016-imi pinerluttuliortoqarneranik unnerluussinerit tamarmiusut 47 procentii pigisanik tillinnermut tunngassuteqartut, aammalu pinerluttulerinermi inatsisip ataani unnerluussinerit 65 procenterigaat.

Pigisanik tillinniarluni pinerluttuliornerit amerlanersaat tassaapput pisuttorniarluni pinerluttuliornerit, tassalu najugarinngisamut iserterluni tillinniarnerit, tillinnerit, niuertarfinni tillinnerit aammalu biilinik umiatsianillu akuerineqarani atuinerit. 2016-imi pigisanik tillinniarluni pinerluttuliornerni niuertarfinni tillinnerit amerlanerpaapput, pigisanik tillinniarluni pinerluttuliornerit 19 procenteralugit.

Pigisanik tillinniarluni pinerluutit ataanniippoq aamma aserorterineq. Aserorterisoqarneranik unnerluutiginninnerit 19 procentiupput, pinerluttulerinermi inatsisip ataani unnerluutiginninnerit 9 procenteralugit.

Peqquserlunnerit marloriaatinngortut

Pinerluttuliornermi amerlassutsitigut procentitigullu qaffariaateqarfiunerpaasoq peqquserlunnermut tunngassuteqarpoq, tassunga ilaalluni piginnaatitaanernik atornerluineq. Unnerluutiginninnerit 223-t nalunaarsorneqarsimapput 2015-imullu naleqqiukkaanni 94 procentinik amerleriaateqarlutik. Nunatsinni Naatsorsueqqissaartarfik tusagassiorfinnut nalunaaruteqarluni taama allappoq.

2015-imi peqquserluttoqarneranik unnerluussinerit 115-iupput, 2016-imilu 223-ullutik. Peqquserlunneq pigisanik tillinniarnerup ataani inissisimatinneqarpoq.