Peqqissutsikkut timersornermilu maligassiuisut tv-kkut nersorniarneqalersut
Nunatsinni Timersoqatigiit Kattuffiat, Peqqissutsimut Naalakkersuisoqarfik aamma Elite Sport Greenland "Maligassiuisut Showimik" aaqqissuisuupput, peqqissutsikkullu timersornermilu maligassiuisut nersorniarneqassapput.
Nunatsinni pikkorivissortut angusaat Elite Sport Greenlandimit unnuup ingerlanerani nersorniarneqassapput, ”Ukiumi takutitsilluarnerpaaq” nersorniarneqassalluni.
Aamma inummik ataatsimik iligiinnilluunniit takutitsilluarsimasumi/nik ”Hall of Fame”-tut nersornaasiisoqassaaq. Nunatsinni Timersoqatigiit Kattuffiat tusagassiorfinnut nalunaaruteqarluni taama allappoq.
Allanut isumassarsiorfiussasut
- Pingaaruteqarluinnarpoq suliniutigisartagaat annertuut namminneq piumassutsiminnik ingerlattagaat nersorniarneqarnissaat. Annertuumik kivitseqataasarnerat peqqissutsimut isumalerujussuuvoq.
Pingaaruteqarpoq oqaluttuat nuannersut aamma suliniutit nuannersut oqaluttuarinissaat, allanut isumassarsiutaasarmata suliniuteqarnissamut aalanerunermik siuarsaanissamut, peqqissutsimut naalakkersuisoq, Agathe Fontain taama oqarpoq.
”Maligassiuisut Show” Katuami Hans Lyngep Inersuani arfininngornermi decembarip pingajuani nal. 19.00-20.30 ingerlanneqassaaq KNR TV-kkullu toqqaannartumik aallakaatinneqassalluni.
Isissutissat Katuap nittartagaatigut pisiarineqarsinnaapput.
