Peqqissaasut ileqqorissaarnermut siunnersuisoqatigeeqalersut
Tamannali tikitsinnagu peqqissaasut najoqqutassaat ilusilersorneqarlutillu ineriartortinneqassapput.
- Peqqissaasutut sulinitsinni inuit inuunerminni assigiinngitsunik killiffillit sullittarpagut, tassa inunngorneranniit toqunissaannut. Inunnik naapitsisarnitsinni attaveqarnitsinnilu isummerfissat amerlasaqaat. Napparsimasut ilaqutaasullu nalaataannut tunngatillugu siunnersorlugillu tikkuunniartarpugut, siunnersuisoqatigiinni siulittaasunngortoq Inuuti Fleischer KNR-imut oqarpoq.
Peqqissaasut ulluinnarni sulinerminni aporfiit ileqqorissaarnissamut tunngasut naammattoortuartarpaat.
- Akunnattoorfiit aqukkuminaassinnaasut naammattoortarpagut, taakku tassaasinnaapput naleqartitanut "uniuuttut". Soorlu; sooq napparsimasup misissortinnissaa innersuussutigissavarput, nalunngikkutsigu kinguneqarnavianngitsoq?, Inuuti Fleischer nassuiaavoq.
Peqqissaasut Kattuffiat novembarip aappaani ataatsimeersuartitsimmat Peqqissaasut ileqqorissaarnermut siunnersuisoqatigiiat pilersinneqarpoq, maannalu Inuuti Fleischer siulittaasutut Rikke Bruun de Neergaardilu siulittaasup tulliatut inississimalerput.
Siunnersuisoqatigiit peqqissaanermi ileqqorissaarnermut atatillugu ajornartorsiutinik ersersitsinissamut, ilaasortanik akunnattoorfeqartutut misigisunik tapersersuinissamut ileqqorissaarnissamullu maleruagassanik inerisaanissamut tunngatillugu sulianik aallartitsinissartik qilanaarat.
Siunnersuisoqatigiit taamaaliornermikkut napparsimasunut ataasiakkaanut peqqissaanerup pitsaassusaa qaffatsissagaat oqaatigineqarpoq.
Siunnersuisoqatigiit ukioq siulleq atorlugu peqqissaasut naleqartitaat ileqqorissaarnissamut tunngasut inerisassavaat.
