PBS kisiat atorlugu INI-mut akiliisoqarsinnaanngorpoq
Inissiaatileqatigiiffimmi A/S INI-mi illunik inissianillu attartortut akiliutigisartagaat ullut 14-ikkaarlugit inissiaatileqatigiiffiup allafeqarfiinut akiliisarneq ukiamit atorunnaarsinneqassasoq, inissiaatileqatigiiffik nalunaarpoq.
A/S INI-p inissiaataanni najugaqartut attartornermut akiliutaat PBS atorlugu siunissami akilerneqartalissaaq - tassalu inissiamik attartornermut akiliut aningaaserivimmi kontomit ilanngaatigineqartalissaaq.
Inissiaatileqatigiiffimmit siunnersuutigineqarpoq ullut 14-ikkaarlutik aningaasarsisartut aningaaserivinni missingersuutinut kontomik pilersitseqqullugit, inissianut akiitsoqartartut ajornartorsiutigineqartarnerat qaangerniarneqarmat.
PBS atorlugu akiliisarnikkut inissianik attartornermi akiliutigineqartartoq piffissaq eqqorlugu akiliisalernissaq qulakkeerneqassaaq pisariinerussallunilu.
Aamma atuaruk Narsami 2015-imi anisitaasussat 89-upput
Ullut 14-ikkaarlugit inissiaatileqatigiiffiup allafeqarfiinut akiliisarneq inissiaatileqatigiffiup sulisuinut piffissamik sivisuumik atuiffiusarpoq.
Taamaattumik ullumikkumiinngaanniit ullut 14-ikkaarlugit inissianik attartornermut akiliisarnissamik isumaqatigiissuteqartoqarsinnaajunnaarpoq.
Ullut 14-ikkaarlugit inissianik attartorluni akiliuteqartarnermik isumaqatigiissuteqartarneq oktobarip aallaqqaataani atorunnaassaaq.
A/S inissiaatileqatigiiffimmi INI-mi illunik inissianillu attartortut nuna tamakkerlugu 955-it ullut 14-ikkaarlugit akiliisarput.
Immikkorluinnarli ittoqartillugu, soorlu attartortoq PBS aqqutigalugu akiliisarnissaanut itigartitaasimappat immikkut ittumik aqqiisoqarsinnaasassasoq, A/S Inissiaatileqatigiiffik INI tusagassiuutinut nalunaaruteqarluni taama allappoq.
