Pavep nunap inoqqaavinut utoqqatsernissaa neriuutigineqartoq
Canadami premierministeri Justin Trudeau Pave Fransilu sapaatit akunneri marluk qaangiuppata ataatsimiissapput.
Ilumoortussaq Saammaateqatigiinnissarlu pillugit Isumalioqatigiissitap, inuit, indianerit metissillu meerartaasa Canadap atuarfiini naalliutsitaasarsimanerat pillugit misissugaqartup, innersuussutaasa 94-iusut atuutilersinnissaat Justin Trudeaup anguniassallugu neriorsuutigereerpaa.
AAMMA ATUARUK Pave Frans nunat inoqqaavinut utoqqatserpoq
Innersuussutillu ilagaat pave meeqqat atugarisimasaat pillugit pisortatigoortumik utoqqatsernissaanik qinnuigineqassasoq.
Atuarfiit 140-t, atuartunik timikkut tarnikkullu naalliutitsisarsimasut, affaasa missaat katuullit oqaluffiinit Canadap naalagaaffianik suleqateqarlutik aquppaat.
AAMMA ATUARUK Palasit atornerluisarsimasut pavep ajuusaarutigeqai
Atuarfiit sinneri palasinit ilinniartitsisunillu naaggaartuusunit aqunneqarput.
Taakkuali, Canadap naalagaaffia ilanngulluni, nunap inoqqaavinut utoqqatsereerput. Katuullit oqaluffiat utoqqatsernissaa amigaataaginnalerpoq.
Canadap inoqqaavisa Trudeaup Pavemik meeqqanut utoqqatserusulersitsinissaa neriuutigaat. Tamanna inuppassuit ukiorpassuarni utaqqivaat.
