Partiit saamerliit Aleqa Hammond suleqatigiunnaaraat
Socialdemokraatit taama nalunaaruteqarput.
Partiip gruppiani siulittaasup Henrik Sass Larsenip Aleqa Hammondip Venstrep ataatsimiititaliami siulittaasunngornissamik neqeroorutaanut akuersinera, taamaatullu Venstrep ilaasortaatitamik ataatsimik ilaneqarnera paasiuminaatsillugulu pakatsissutigaa.
Socialdemokraatit Hammond Nunarpullu suliani assigiinngitsuni arlalinni tapersersuisimapput, ilaatigut puisit amiinik EU-mut eqqussinissap inerteqqutigineqalernissaa pinngitsoortinniarlugu kiisalu kalaallit inooqataanikkut ajornartorsiortut suliniuteqarfigineqarnerat pillugu, Socialdemokraatit taama allapput.
Aamma atuaruk Alaatsinaattoq: Løkkep paarlaaqatigiinnikkut talerperliit amerlanerussuteqarnerulersippai
Ataatsimiititaliamili siulittaasunngornissaq pingaartitanit pingaarnerusimagunarpoq, Socialdemokraatit taama isornartorsiuipput.
- Pakatsissutigeqaarput. Siulittaasup tulliatut ingerlaannannginnermigut Kalaallit Nunaallu pillugu sulinermini Socialdemokraatinit partiinillu saamerlernit allanit tapersersorneqarunnaarnermigut, tapersersortissaqarani ataatsimiititaliami siulittaasutut imminut taagorniaannarluni Aleqa Hammondip pingaartitani tunulliuppai. Siulittaasutut siulittaasullu tulliatut atuuffiit assigiinngissutaat tassaaginnarpoq siulittaasoq ataatsimiititaliaq sinnerlugu tusagassiuutinut oqaaseqartartuummut, soorlu assersuutigalugu ataatsimiititaliap paasisassarsiorluni angalanissai pillugit imaluunniit ataatsimiititaliap nalinginnaasumik sulinera pillugu.
Aamma atuaruk Aleqa Hammond Nunarput pillugu ataatsimiititaliami siulittaasunngortoq
Socialdemokraatit Siumut qaninnerusumik maanna suleqatiginialersaarpaat, Nunatsinni qinersisartut socialdemokraatiusut Folketingimi sunniuteqarnissaat qulakkeerniarlugu, Socialdemokraatit taama nalunaaruteqarput.
Suliani Lars Løkke Rasmussenip ministeriunertut uppitinneqarfigisinnaasaani danskit naalakkersuisuinik itigartitsilluni taaseqataannginnissamik neriorsuisinneqarluni Aleqa Hammond Kalaallit Nunaannut tunngasunut ataatsimiititaliami siulittaasunngorpoq.
