Partiit qaleraliit pillugit erseqqissumik oqariartuuteqaqusipput

Kim Kielsenip Inatsisartut ataatsimiinnerisa ammarneqarnerani oqalugiaatimini Qeqertarsuup Tunuani qaleralinniarnermut tunngasumik oqaasii paatsuungatitsipput. Inuit Ataqatigiit Demokraatillu taamaammat erseqqissaaqqusipput.

- Aalisarnerup aalisagaqassutsillu taama annertutigisumik Qeqertarsuup Tunuani allannguuteqarnerata kingorna Naalakkersuisuni pisussaaffigaarput aalisartitsivimmi tassani aalisarnerlu ataatsimut isigalugu nutaamik aqutseriaaseqarnissamik isumaliuteqarnissatsinnut, Kim Kielsen ukiakkut ataatsimiinnerup tallimanngormat ammarneqarneranut atatillugu oqalugiarnermini taama oqarpoq.

Tamannalu aalisarnermut naalakkersuisup, Karl-Kristian Krusep, sapaatip akunnerata ataatsip matuma siorna oqarneranit allaaneruvoq.

AAMMA ATUARUK Qaleralinnik isumalluuteqarneq nalilersoqqinneqartariaqarpoq

Qaleralittassiissutit allanngortinneqassanngitsut Karl-Kristian Kruse Qanoruumut taamani oqarpoq. Tamannalu ullumi oqaatigeqqippaa.

- Taama isikkoqartumik oqallittoqassappat, taava soorunami oqaloqataaffigissavara. Kisianni aalajangiusimasakka illersorumaarlugit naatsorsuutigaara, Karl-Kristian Kruse ullumi ataasinngornermi taama oqarpoq.

Naalakkersuisut avannaani qaleralinniarnerup aqunneqarneranut qanoq iliorniarnersut pillugu Inuit Ataqatigiit politikkikkut oqaaseqartartuata, Bendt B. Kristiansenip nalornissutigivaa.

AAMMA ATUARUK Krusep qaleralittassat pillugit inassuteqaat malikkumanngikkai

- Tusaasinnaasatsitut Naalakkersuisut assigiinngitsumik isumaqarput. Aalisarnermut naalakkersuisoq pisassiissutinik nikisitserusunngitsoq, Naalakkersuisut siulittaasuat allannguinissamik oqariartuuteqartoq. Tusartariaqalerparput qanoruna iliuusissanik takkussisoqarniartoq. Tamanna pisariaqartinneqaavippoq, Bendt B. Kristiansen taama oqarpoq.

Nivi Olsen, Demokraatineersoq, aamma paatsuungavoq.

- Paatsiveerunnartorujussuuvoq. Ingammik una qaleralik qanoq pingaaruteqartiginersoq eqqarsaatigigaanni. Uanga isumaqarpunga aalisarnermut naalakkersuisoq susoqarniarnersoq nassuiaatissalluta, Nivi Olsen, Demokraatineersoq, taama oqarpoq.

KNR-imit Kim Kielsen tamatuma kingorna oqaloqatigaarput, taassuma aalisarnermut naalakkersuisoq, Karl-Kristian Kruse aalisarnermut naleqqussaasoqarnissamut maanna akisussaalernerarpaa. Imaanngilarli pisassiissutinik annikilliisoqassasoq, Kielsen oqarpoq.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!