Folketingimut qinersineq 2015 Partiit kina ministeriunertut tapersersorpaat?

Atassut partiini kisiartaalluni kina minitseriunertut toqqareernerlugu erseqqissumik oqaatigaat.

Aamma atuaruk Folketingimut qinersineq 2015 Savalimmiormiut aalajangiisooratarsinnaasut

Folketingimi juunip 18-ni qinersereernerup kingorna kina ministeriuninngussanersoq aamma Kalallit nunaanniit ilaasortanngortussat apeqqutaaratarsinnaapput.

Taamaattumik nunatsinni partiit kikkut tapersersorpaat?

- Venstrekkut, atassut taama ersaritsigaaq.

Taakku isumaqarput saamerliit naalakkersuinikkut aqutsineq tigummileraangassuk pissutsit allanngungaarneq ajortut. Taamaattumik Atassutip venstre suleqatigalugu tamanna allangortinniarniaraa, Steen Lynge saqqummeereerpoq.

Sinnerisa inissinngilaat

Partiinilu allaniit tamanna siumut aalajangereerneqanngilaq.

- Mattussuinngilanga aallaaqqaammut oqarlunga, ima ittunik ima ittunillu suleqateqarnianngilanga, Siumumit folketingimut qineqqusaartitaq Martha Abelsen oqarpoq.

Siumukkut kingullermik Socialdemokratit qinerpaa, taakkunaniillu 2013-mi inatsisartunut qinersinissamut 40.000 koruunit missaannik aningaasaliiffigineqarput.

Siumumiit naalakkersuisooqatigiilersussani nunatsinnut iluaqutaanerpaasussat tapersersussavagut, Martha Abelsen oqarpoq.

Aamma atuaruk Qinersinermi danskit naligiinnerujussuisa sunniuteqarterujussuassavaatigut

Demokraatillu Inuit Ataqatigiillu aperigatsigit siumup akissutaanut assingusumut tamarmik akissuteqarput. Ilaasortaatitat sunniuteqarnerpaaffigisinnaasaat apeqqutaatinneqarput.

Demokraatimmi saamerliit talerperliilluunniit isumaqatigiissusiorfigissanerlugit oqaatigeersinnaannginnerarpaat:

- Siumut oqaatiginianngilarput kina statministeriussanersoq, qallunaat nammineq taanna aalajangerumaarpaat, Randi Vestergaard Evaldsen Demokraatit folketingimut qineqqusaartitaat taama oqarpoq.

Siornatigut Inuit Ataqatigiit SF-kkut teknikkikkut suleqatigereerpaat, partiimilu tapiissutinik tigusaqarneq ajorlutik, qineqqusaartup Aaja Chemnitz Larsenip naqissuserpaa.

Taamaakkaluartoq IA-mit Dansk Folkepartiikkut isorineqarput, isumaqaramik Kalaallit Nunaat pillugu nakkarsaallutik oqaaseqarnikuummata. DF-kkullu Lars Løkke Rasmussen ministeriunertut tapersersorpaat.

Taamaakkaluartoq Aaja Chemnitz Larsenip talerperliit suleqatiginissaat tunuartinngilaa.

- Partiinut assigiinngitsunut isorinnippugut, aamma dansk folkepartiikkunnut, taakkumi kalaallit nunaannut isorinnikuupput, soorunami kalaallit nunaat danmarkip kommunerisaatut oqariartuuteqartunut isorinnippugut, kisiannilu kikkut tapersersornerlugit siumoorluta oqaatigeerusunngilarput, Aaja Chemnitz Larsen oqarpoq.

Partii Naleqqakkut aqagu kikkut qineqqusaartissanerlugit saqqummiunniarpaat.

Qinigassanngortittut UANI takukkit!