Naliliisartoq: Partii Naleqqap uppernassusaa innarlerneqarsorineqartoq

Per Rosing-Petersenip Partii Naleqqamit ukiup affaa qaangiummat anisitaareerluni uternissaminut tikilluaqqusaasoq partiimi siulittaasoq, Hans Enoksen KNR radiumi aallakaatitassiamut, Inuiaat Tillernerannut, marlunngormat oqarpoq.

Tamannalu politikkikkut naliliisartumit, Ilisimatusarfimmilu tusagassiornermut immikkoortortaqarfimmi pisortamit, Naja Paulsenimit, tupigineqarpoq.

- Tupinnaannartumik allamut saaqattaarneruvoq, Naja Paulsen oqarpoq.

Per Rosing-Petersenip Partii Naleqqamut ilaasortaanermini isummanik akerleriiffiusunik oqaaseqaqattaareerluni partiimit anisitaavoq.

Partii Inunnilu qaammatini marlunni siulittaasooriarluni sapaatiummat tunuarpoq, Partii Naleqqamullu uteqqilerluni Inuiaat Tillernerannut oqaatigalugu. Partii Naleqqamullu saaffiginninnera tikilluaqqullugu Hans Enoksen Inuiaat Tillernerannut oqarpoq.

Tamannalu qinersisartunit malugineqanngitsoornavianngitsoq, Naja Paulsen isumaqarpoq.

- Tupigilaarpara, Hans Enoksenip Per Rosing-Petersen siorna aniseriarlugu maanna utertinnialermagu. Qinersisartut isaannit isigalugu taamatut allamut saaqattaarneq pinngitsoorani uppernassusermut innarliissaaq, Naja Paulsen oqarpoq.

Per Rosing-Petersenip siullerpaamik partiini taarsilinngilaa. Tamannalu suleqatigiikkuminaanneranik takussutissaasoq, politikkikkut naliliisartoq isumaqarpoq.

Taamaammat Rosing-Petersenip partiimut uterteqqinnissaa sumik tunngaveqarnersoq, Naja Paulsenip paasiuminaatsippaa.

- Qanoq pissarsiaqarnissaat takujuminaappoq, misilittakkat pitsaanngereermata. Kisianni namminneq iluaqutigisinnaasimagamikku uterteqqinniarpaat, Naja Paulsen oqarpoq.