VIDEO Partii Inuit: Malersugaavugut
Epinionip qinersisartut isumaannik misissuinerata takutippaa Partii Inuit Inatsisartunut ilaasortaateqalernissaat qularnartoq, ilaatigut isumasiuinermi inuit aperineqartut 2 procentiinnaat partiimut qinersiumaarlutik nalunaarput. 2013-imi 6,5 procentinik qinerneqartut.
Partii Inuilli qinersinissap tungaanut sukataarniarput:
- Tassa sukataarnerput ingerlatiinnassavarput, aamma kalaallisut anersaaqarluta suliniarnerput taanna ersarissassavarput, Partii Inuit siulittaasuat Nikku Olsen KNR-imut oqarpoq.
Qinersinissamullu isumalluarpoq:
- Soorunami sapinngisamik annertuseriarnissarput aamma suliniutigaarput, Nikku Olsen oqarpoq.
Inatsisartunulli ilaasortaatitaqarnermi nalaanni angusaat naammaginanngitsutut nalilerneqarpoq, tamannalu qinersisartut malugisarsimassagaat naliliisoqarluni:
- Qinersiviup uuma iluani aamma takuneqarpoq Inatsisartuni suliaqanngitsut, immaqa taamatut oqaatigilluaannaraanni, arlaatigut siunnersuuteqarniaraluaraangamik siunnersuut ataaserluunniit saqqummiutinngilaat, Daniel Thorleifsen politikikkut naliliisartoq KNR-imut oqarpoq.
- Taamaattoqanngilaq, aattaannguaq oqaatigeriikkakka malillugit suliassagut ilungersorluta suliniutigivagut, kisianni malersorneqarnerput aamma tassuuna politikikkut ersarissumik sorsunneqarnerput ersarissoq ersassavarput, Nikku Olsen ersarissaavoq.
Partii Inuit politikikkut suliniutitik ersarissarlugit ilaatigullu tusagassiutitigut qaqinneqarneq ajortut qineqqusaarutigissavaat:
- Saqqummiunneqarnaveersaarneqartartut suliagut pillugit aamma politikerput pillugu saqqummiussussavagut, soorunalimi, Nikku Olsen oqarpoq.
