Parnaarussiviliorneq kinguartooqqippoq

Nuummi parnaarussiviliorneq ukiup affaa missiliorlugu kinguartoorpoq. Tamanna sulisussaaleqinermik ilaatigut peqquteqartoq, danskit inatsiseqarnermut ministeriata Søren Pape Poulsenip Naalakkersuisunut ilisimatitsissutigaa. Aviisi AG taama allappoq.

Pilersaarutit malillugit parnaarussivissaq, pinerluuteqarsimasunut isumannaallisakkamik immikkoortortaqartoq, aasami 2018-imi atoqqaarfissiorneqartussaagaluarpoq.

Sulisussaaleqineq ajornartorsiutaasoq

Taamaanngilarli - sanaartorneq ukiup affaanik kinguartoortoq, danskit Naalakkersuisui qaammami matumani Naalakkersuisunut ilisimatitsipput. 

- Sanaartorujussuarneq entreprenørinut arlalitsigut ajornartorsiortitsisimavoq sulisussaqarniarnerlu ajornakusoorsimasoq, Danmarkimi inatsiseqarnermut ministereqarfik Inatsisinut atuutitsinermut Naalakkersuisoqarfimmut taama allappoq.

Paarnaarussivissamik sanaartorneq pilersaarutaaqqaaraluartumit kinguaattooqqareerpoq, 2017-ip naanerani ammarneqartussaagaluarmat.

Kisianni parnaarussivissuup 2019-imi upernaakkut inerneqarnissaa maanna naatsorsuutigineqalerpoq.