Joorut Knudsen Qassiarsuup eqqaani Sammisumi savaatilik Assi: KNR

Panernersuaqartarnera savaatilinnut ajornartorsiortitsivoq

Nunatta kujasinnerusortaani upernaakkut sialoqassanani nuna ukiuni kingullerni panertaqimmat, savaatillit ilaannut kingunerluppoq

Ivikkat ikinneroqisut katersorneqartalermata savaatillit ilaat nerukkaatissanik nunanit allaniit amerlanerusunik allatut ajornartumik tikisitsisariaqartalerput.

Joorut Knudseni Qassiarsuup eqqaani savaatillit aqqaniliusut akornanni Sammisumi savaateqarpoq.

Ivikkerinerup naligaa, ivikkat poortorneqarlutik katersorneqartut  ukioq mannali  ikinneroqaat.

 - Massakkkkut 90-ingajaapput, affaangillalluunniit. Sulimi killugassaqalaarpunga. Neriuppunga 60-it sinneqqissallugit, Knudsen oqarpoq.

AAMMA ATUARUK Kiannerulernera nunalerinermi periarfissanik nutaanik ammaassisoq

Siornatigut amerlanerujussuarnik  ivikkanik katersuisoqartarpoq.

- Siornakkunnili aamma panernersuaqaanavikkami. 200-it tikissinnaagunikku ajorneq ajoraluarpoq nalinginnaasumik. Kisiat panernersuaqarneq ajorallarmat 4-500-it tungaanut katersortaraluarpagut, Joorut Knudsen taama oqarpoq.

Upernaakkut panernersuaqartarnera pissutigalugu ivikkat katersorniarneqartut  amerlanerusinnaanngillat.

-Junimi panernersuaq aallartikkajuttarpoq. Taamaammat tamatuma nalaani nutarterissagaani panerpallaartarami. Ilungersunaqaaq taamak nalaataqaqattaarluni ukiuni tulleriinni arlaqalersuni.

AAMMA ATUARUK Savaatilinnut 37-nut katillugit 26 millionit tapiissutigineqartut

Savanullu nerukkaatissat kimittuut pisarnermiit amerlanerit Joorut Knudsen-ip ukioq manna aamma piniartariaqarsimavai.

- Tikisitsinerusalernikuuvugut allatut ajornartumik. Siorna aamma ikiorserneqarluta immikkut nerukkaatissanik tikisitsisoqarpoq panernersuup piliaanik
Joorut Knudsen Qassiarsuup eqqaani Sammisumi savaatilik taama oqarpoq

Silap pissusiata allanngorneratigut Kalaallit Nunaanni nunalerisunut sunniutai pillugit nalunaarusiaq Aarhus Universitetimit suliarineqartoq ukiormanna saqqummersinneqarpoq taanna Namminersorlutik Oqartussanit suliakkiutigineqarluni.

Ukiup ilaata naatitsiviusup sivisunerulernissaa kiannerulernissaa naatsorsuutigineqarsinnaasoq ilisimatuut ilaatigut erseqqissaatigaat.

Tamannalu kujataani savaatillit nunalerisullu iluaqutigisinnaavaat, ivikkanik piffissami sivisunerusumi naatitsisinnaalissammata.

Kisianni tassa naluaarusiami ilisimatuunit erseqqissaatigineqarpoq nunap panernerulernissaa  , taamaammat aamma imerterinermut atortut nerukkaatissatullu periarfissat allat isiginiarneqassasut.

AAMMA ATUARUK Savaatillit nunap panernersua pillugu ikorneqarnissamik utaqqipput

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!