Pan Am-ertoqarnissaanut assartuinissat aningaasallu amigaataasut

GHF-ip aningaasartuutissanik aningaasassarsiornermilu siulersuisut peqatigalugit kattuffiup Pan Am 2018-imi Nuummi ingerlanneqarnissaanik piviusunngortitsiniarnera sulissutigaat. Suliassalli annertuut utaqqipput.

Assammik arsaannermi unammersuaarnerit Nuummi ingerlanneqarnissaat ajugaassutigineqarmat qiimmaatsanneq annikinngilaq.

- Amerikap nunavittaani assammik arsarnermi unammersuarnerit aaqqissuussisussaannut taasititsisoqarmat Nunatta ajugaaneranik nuannaarutigisannik nalunaarfigineqarpunga. Timersornerni Nunatsinnit ingerlanneqartuni tamani anginerpaajussaaq, Kalaallit Nunaanni Assammik Arsartartut Kattuffiatalu namminwq unammisarfitsinni nunat tamalaat unamminissaannik kissaataata piviusunngortinnissaanik periarfissiivoq, Nuka Berthelsen, GHF-imi siulittaasuugallarnermini 2016-ip aasaanerani suliassamut angisuumut qilanaarluni oqarnikuuvoq.

Siulittaasuusimasup missingersuusiornikkut aaqqissuussinissamullu aningaasassat qulakkeerinninnissaq suliassarujussuussasoq siulittortornikuuaa. 

Suli suliassarpassuusut

Maannalu – Pam Am-ertoqarnissaanut qaammatit quliinnanngoreeraluartut GHF-ip aaqqissuussinermut aningaasartuutissarpassuit matussusernissaanut aningaasaliisussarsisimanerluni nalunaarutigisinnaanngilaa.

Amerikap nunavittaani assammik arsarnermi unammersuarnerit, Pan Am-ip, aaqqissuunneqarnera 13,4 millionit koruuneqarnissaa nalunaarutigineqarnikuuvoq. Kattuffiullu aaqqissuussinissani aningaasartuuteqarfiunerpaasussaq tassa nunanut peqataasussanut angallassinissat. GHF-immi nunat peqataasut angalanerat akilerniarlugu Nunatsinni Pan Am-imik aaqqissuussinissamik qinnuteqarnermini neriorsuutigisimavaa. Tamannalu suliassamik annertuumik malitseqarpoq.

Timmisartunik attartornissamik isumaqateqarniarneq unammillernangaatsiarsimasoq, GHF-imi siulittaasup, Jørgen Olsenip oqaatigaa.

Ajornartorsiutillu taakku suli aaqqiissuteqarfigineqanngillaq, piffissallu ingerlanerani akit qaffakkiartuinnavipput. Taamaalilluni angallassinissamut aningaasartuutissatut missingersuutit qaangerneqarput.

- Angallassinissamut aningaasartuutit amerlanerpaajusut suli inissinneqavinnginnamik. Angalatitsiviit saaffigisimasagut kinguneratigut tunuartilertarneri pillugit. Aamma taakku peqqutaaqataapput kinguartooruteqalaarnitsinni. Aningaasaliisussanik ujarlertussanik oqaloqateqarpugut, Jørgen Olsen KNR-imut oqarpoq.

Naalakkersuisut Kommuneqarfik Sermersoorlu ataatsimoorlutik Nunatsinni Arsartartut Kaffuffiannut 4 millionit sinnerlugit tapersiipput.
Taakku saniatigut kattuffiit assigiinngitsut soorlu, GIF, GHF ESG-lu 4 millionit missaannik aamma tapersiissuteqarput. Aningaasanik tapersiinerit katillugit 8 millionit koruunit missaanniittut qulakkeerneqarput. Unammersuartoqarnissaanullu aningaasartuutissatut missingersuutinut 5 millionit koruunit suli amigaataapput.

Missingersuutit ataqatigiissaarnerat suli sulissutigineqarmat tamatuma allattorsimaffiat KNR-imut takutinneqarsinnaanngitsoq GHF-ip siulittaasuata, Jørgen Olsenip KNR-imut paasissutissiissutigaa.

GHF-ip Pan Am 2018-ip Nuummi ingerlanneqarnissaanut misssingersuusiornermik aningaasassarsiornermillu siulittaasussanik pilersitsillutik maajimi KNR-imut oqaatigaa.

Siulersuisussalli siulittaasuata atuuffigilikkani peqquteqarluni qimattariaqarsimagaa tamannalu suliamik kinguaallatsitsisimasoq, GHF-ip siulittaasuata paasissutissiissutigaa.
GHF-imili siulittaasup kattuffik pisinnaasani tamaat atorlugu sulissuteqarniartoq saqqummiussassaqalerunilu nalunaaruteqarniartoq erseqqissaatigaa.