Paggivittami naggueqatigiit Inuit pillugit filmi takuteqqaarneqarpoq
Filmi tuluttut taaguuteqartinneqartoq Trapped in a Human Zoo… “inuit uumasuusiviani mattussaaqqaneq” Ottawami sapaatip akunnerani kingullermi siullerpaammik takutinneqarpoq, CBC TV-milu sapaatip akunnerani uani tamanut takutinneqassalluni.
Paggivittami naggueqatigiit Inuit arfineq pingasut 1880-imi takusassanngortillutik Europamukarnissaminnut akuersisut, filmip oqaluttuaraa. Qatanngutigiinniat
ajoqersuiartortitat akerliugaluartut taakku arfineq pingasut aallarusussimapput. Siulittaasuata Abraham Ulrikab nunaqarfimmi Hebronimeersup angalanermi ullorsiut
imaannaanngitsoq allaaserisimavaa.
Filmimik suliarinnittup France Rivetip Ottawameersup, Hebron 2009-imi tikeraaramiuk inuit arfineq pingasut oqaluttuassartaat tiguartiffigisimanermik itinerusumik
misissortariaqarsimavaa.
Angalanermi alianartunngorpoq.Taakkuami arfineq pingasut uumasuusivinni saqqummersinneqarput, ilaatigut Berlinimi, Hamburgimi Parisimilu, Tuttut amiinik
atisalianik atugaqarlutik, tasermi sanaami qajartorlutik, puisinniartuusaartarsimapput.
Isiginnaartunit nuannarineqaqaat. Iluatsitsilluarnerlu alianartumut saapallappoq, qaammatit arlaqanngitsut ingerlanerini inuit arfineq pingasut kuppillutik toqupput.
Europamilu sumiiffinni assigiinngitsuni ilineqarput. France Rivetip misissuineq iluatsillugu inuit taakku tamarmik ilerfiisa sumiiffii nassaarisimavai. Filmip takutippaa,
Johannes Lampe, Qatanngutigiinnianiillu Nainimi palasi peqatigalugu inunnik arfineq pingasunik takussutissanik ujaasisut.
France Rivetip maanna sulissutigaa Abrahamip kissaataa kingulleq Paggivittamut asasaminut uternissi eqquutsinniarlugu tassalu timaasa angerlaannissaa iluamillu
qatanngutigiinniatut ileqqut malillugit Paggivittami ilisaanissaat.