Paasititsiniaalluni aqumiussarsiortoqalersoq
Aalisakkerinermik suliffeqarfiit arlallit Sulisitsisut Kattuffiat GA peqatigalugu aqumiussarsiornialerput.
Aallaqqaasiutigalugu suleqatigiissitanik pilersitsisoqarpoq. Tassanilu suleqataasut tassaapput Imarsiornermik Ilinniarfik, Polar Seafood, Royal Greenland, Royal Arctic Line, Sermilik kiisalu Sulisitsisut Kattuffiat GA.
- Umiarsuaatitta sapinngisamik kalaallinik amerlanerpaanik inuttalersornissaat pingaarnertut kissaatigaarput, GA-mi allattoqarfimmi pisortaq Karsten Lyberth-Klausen oqarpoq.
- Taamaammat inuusuttut pikkorissut imarsiornermik ilinniakkanut, aalisarnerup iluanut umiarsuarnullu assartuutinut pissarsiariniarnissaat sulissutiginiarparput. Matumanilu pingaarnertut pineqarput aqumiut, maskinmesterit aalisakkerinermilu teknologit, allattoqarfimmi pisortaq oqarpoq.
Maannakkorpiaq ilinniartut 59-it amigaatigineqarput, siunissarli ungasinnerusoq eqqarsaatigalugu pilersaarusiornissaq pisariaqarpoq, taamaaliornikkut ukiut 5-10-t qaangiuppata aqumiut pisariaqartinneqartut anguneqarsinnaanngorlugit, Karsten Lyberth-Klausen oqarpoq.
Aqumiussaaleqineq aalisarnermik inuussutissarsiuteqarnermi ajornartorsiutaavoq ilungersunartoq, angallatimmi inuttalersorneqarnissaat pillugu nalunaarutip malinniarnissaa ajornartorsiutigineqartarmat. Peqatigisaanillu maanna aqumiuusut utoqqaliartulerlutik, taamaammat ukiut qulit qaangiuppata taakku soraarninngorpata taartissaqannginnissaat aarleqqutigineqarpoq.
Suleqatigiissitat ilaatigut paasititsiniaaniarput, piumasaqaatit, ilinniarnerup ingerlanissaa kiisalu sulinermi atugassarititaasut suliffissarsinissamullu periarfissat sammineqassallutik.
