Paamiuni containerit qerititsiviutigisut serlersaarfigineqartut
Paamiut umiarsualiviani containerit qerititsiviutigisut serlersaarfigalugit qaminneqartartut ikigisassaajunnaarsimasut, paamiut umiarsualiviani pisortaq Niels Lorentzen oqarpoq.
Tallimanngormat containerit raajanik tunisassiareriikanik tunisassassanillu imallit, aammalu ilaat nioqqutissanik imallit 23-it qaminneqarsimapput, arfininngormat tallimat qaminneqarsimallutik, unnuarlu aamma marluk qaminneqarsimallutik.
Kikkut taamaaliortarsimanersut suli paasineqanngikkaluartoq Niels Lorentzen oqarpoq, asaanerani meeqqat Paamiut umiarsualiviani pinnguartarnerat ilisimaarigamikku ilimagalugu meeqqat inuusuttuaqqalluunniit taamaaliortarsimassasut.
Paamiut umiarsualiviatalu pisortaa Niels Lorentzen angajoqqaanut kajumissaaruteqarpoq meeqqatik oqaaqqissaasagaat, containerinik qamiterisarneq akisuumik kinguneqarsinnaamat.
Maannamullu qerisut tassaasut raajat nioqqutissiareriikat, aammalu nioqqutissiassat, pisiniarfinnilu nioqqutissat qerisut allat tungaasigut annaasaqartoqarsimanngilaq, umiarsualivik pigaartoqartarallartillugu containerit qerititsiviutigisut aallarteqqinneqartarsinnaasimammata.
