Perorsaasut: Politikerit Danmarkimit ikioqqusariaqaraluarput
Sulisussaaleqarnerup suliassat amerlasoorpassuanngortippai. Ilaatigut meeqqanik sumiginnaanernut, meeqqerivinni perorsaasut nalunaarutigisaat qaammaterpassuarni uninngaannartarput.
Perorsaasut ilinniarsimasut peqatigiiffianni NPK-mi siulittaasup, Násúnguak Bisgaardip oqaluttuaraa, kommunini isumaginninnermut siunnersortit amigaataaneri nunatsinni meeqqerivinni perorsaasut sulinerannut kigaalaqutaasoq:
- Perorsaasuusugut suliassanik tunniussigaangatta suliassat sivisoorujussuarmik ingerlanneqartarput, sagsbehandlerimik tamakkuninga suliaqartumik amigarnermik imaluunnit taarserartarnermik
Tamannalu kipiluttunartuusoq persorsaasut siulittaasuata oqaatigaa.
Aamma atuaruk Kommune Kujalleq Naalakkersuisunut ikioqquvoq
Isumaginninnermut nakkutilliisut Kujallermi
Namminersorlutik oqartussat isumaginninnermut nakkutilliisuisa pisortaata Johan Lund Olsenip Kommune Kujallermi inunnik isumaginninnermi ingerlatsivimmi suliassat meeqqanut, inuusuttunut, innarluutilinnullu tunngasut misissoriartoqqammerpai.
Isumaginninnermullu inatsisit malinneqanngillat:
- Maluginiartarpara kommunimi ajornartorsiortoqartoq, aamma innuttaasut soorunami saaffiginnittarput, inatsit malillugu kiffartuunneqannginnertik maalaarutigisarlugu.
Tamannalu ajornartorsiutaasoq Johan Lund Olsen oqarpoq.
Taamaammat Kommune Kujallermi borgmesterip Siumumeersup Jørgen Wæver Johansenip suliassarpassuarnik amerliartuinnartunik Namminersorlutik Oqartussanut ikioqqunera ajunngitsuusoq, Násúnguak Bisgaard isumaqarpoq.
- Ikiorneqarnissamut neqeroortarneq kanngunartuunngilaq.
Perorsaasut siulittaasuat oqarpoq, nangillunilu.
- Soorunami siusinnerusukkut aamma ikiuunnissaminnut neqeroortoqarsinnaavoq, suliassarpassuit amerlavallaalertinnagit.
Aamma atuaruk Nakkutilliisut: Sullissinermi kukkunerit arlalissuupput
Qaammaterpassuarni uningaannartarput
Isumassugassanik sumiginnaanernut tunngassuteqartut perorsaasut nalunaarutigisartagaat allaat ukiumi ataatsimi uninngaannartoqartartut, Násúnguak Bisgaardip ilisimaarai:
- Soorlu ilaannikkut ukiup ataatsip missaani, saaffiginnikkaanngatta suliassat ingerlasarput ukiup ataatsip missaani taanna kipiluttunartorujussuuvoq, meeqqat massakkorluinnaq ikiugassat sivisoorujussuarmik ingerlanneqartarput.
Taamaammat Naalakkersuisut meeqqanut inuusuttunullu tunngasunik suliassat pillugit Danmarkimit ikioqqunnginnerat, Násúnguak Bisgaardip tupigusuutigaa.
Nunarpummi ikioqquppat, danskit isumaginninnermut ministeriat, Karen Ellemann ikiunissaminut piareersimavoq.
Ikiuerusunnerullu tigulluarnissaa perorsaasut siulittaasuata kaammattuutigaa:
- Qaquguluunniit meeqqat pillugit suliassat uninngaannarpata ikiortissanik neqeroortoqarpat tigulluartigu.
Perorsaasut pisortaat, Násúnguak Bisgaard taama oqarpoq.
