Orsussap akitsunnginnerani orseriartukaasut

Ikummatissat akiisa ullumikkumiit 60 øremik akitsunnginnerani tankit benzinamik gasimik uuliamillu orsiisarfinni ippassaq unnukkut immerneqapallapput, immiiartortunullu ilaapput Tika Olsen aamma Mathæus Eugenius. 

- Aningaarsartuutissagut allissapput soorunami, kaannissarput ilimanarpallaanngikkaluarpoq. Tika Olsen piffissami matumani nipisanniarlunilu saarullinniartoq taama oqarpoq. 

Ikummatissat akiisa qaffannerat malunnartussaasoq erseqqissarpaa, qanorli annertutigisumik malunnaateqarnissaa oqaatigisinnaanngikkallarpaa. 

- Asukiaq naluara sukkut malugissanerlugu, pisarisartakkat apeqqutaajuaannarput. Pisaqarpiarneq ajorutta soorunami malugisorujussuussavarput, taanna oqarpoq. 

Taamaattorli ajornaviannginnerarpaa, upernarmammi isumalluarpoq.

- Kisianni massakkut upernartorsuanngulerami aalisakkat takkussuutileramik soorunami neriuppugut inuussutissarsiutitsinnik ajunngitsumik ingerlajumaarluta. Sila apeqqutaajuaannarpoq. 

Sila kisimi naalagaavoq

Upernartorsuummat aalisakkanik pisaqarluarnissani neriuutigigaluarlugu akit qaffannginnerani orsernini angumerigamiuk nuannaarpoq, taamaalillunimi taquassani amerlanerulaat pisiarisinnaalerlugit oqaatigaa. 

Orsiisarfimmi allami, akit qaffannginneranni orsernissamik angumersinerminik nuannaartoq alla tassaavoq Mathæus Eugenius. 

- Ukiornissaanut aningaasarpassuulaassapput. Weekendit tamaasa ilummukartaratta illuaqqamut, billeqarlutalu orsussaq atungaatsiartarparput. Mathæus Eugenius angallamminut benzinamik illuaqqamilu kiassaataanut petroliumik pisiniartoq oqarpoq. 
 

Illuaqqaminut angallamminullu orsussamik pisiniartoq Mathæus Eugenius. Assi © : Arnaq Nielsen / KNR

Allatigut aallertoqarsinnaagaluarpa?

Taamaammallu ukiaru aningaasartuuteqangaatsiassamaarluni taanna oqarpoq. 

- Paasinarpoq akitsornera kisianni allatigut aallertoqarsinnaagaluarami. Soorunami nioqqutissanut sunniuteqassaaq, akitsussapput nioqqutissat aamma allat. Sodavandikujuit baajallu akitsoreernikuupput, taanna oqarpoq. 

Ikummatissat akii literimut 60 øremik nunatsinni qaffakkaluartut Danmarkimut sanilliullugu 2,5 koruunimik suli akikinnerusut KNI tusagassiorfinnut nalunaarummi paasissutissiivoq.