Oqartussat immikkut iliuuseqarnialerput

Ilinniartut Nuup Sisimiullu avataani najugaqartut sungiusaatigalugu suliffissaqarnissaat qulakkeerniarlugu, Namminersorlutik Oqartussat ilinniartut inissaannik qulakkeerinnipput. Tamanna nutaatut misilinneqarluni.

Allattoq Paarnaq Hansen, Apollo Jeremiassen

oktobarip 15-at 2015 05:57

Sisimiuni Sanaartornermik ilinniarfimmi KTI-mut imaluunniit Nuummi Jern- og Metal skole-mut piukkunneqarlutit qinnuteqartut ukioq manna 143-pput. Taakkunannga taamaallaat 26-it sunngiusarlutik suliffissaqareerlutik.

2009-mili sungiusarlutik ilinniarfissat appariartorput. 2009-mi KTI-mi piukkunneqarlutit tigusaasut 231-isut akornanni, 69-it sungiusarlutik suliffissaqareerlutik atualerput.

Ullumikkut sungiusarlutit suliniartut taamaallaat 62 procentii inissaqartinneqartarput. Tassa 143-t qinnuteqartut akornanni 26-it taamaallaat sungiusaatigalugu suliffissaqarlutik.

Aamma atuaruk Naalakkersuisut akitsuusersuiniarnertik annikillisippaat

Nunatsinni suliffeqarfissuit ilinniarniartuuteqartarnissaat qulakkeerniarlugu, ilinniartup sungiusartinneqarnera piffissanut marlunnut avinneqarsinnaavoq imaluunniit ilinniarfimmut isumaqatigiisiorlutik piffisamik aalajangersimasumik ilinniartuuteqarnissartik qulakkeerlugu, tassani qanoq pisariaqartitsigineq apeqqutaalluni.

KTI-mi siulersuisuni siulittaasup, Axel Nørskovip tamanna iluarisimaarpaa.

- Sineriak tamakkerlugu sungiusarluni suliffissamik nassaarsinnaangikkaanni, ilinniakkaminnut qinnuteqarsimasut allartinngitsoortut amerlatikkaluttuinnassapput, Alex Nørskov oqarpoq. Taassuma sulisitsisut kaammattorpai, ilinniartunik amerlanernik siunissami tigusisarnissaannik.

Nunatsinni sanaartornerit qaffariarput, Nuummi talittarfissuaq sananeqarpoq, Aasianni ilinniarnertuunngorniarfik iluarsartuunneqarpoq aamma Ilulissani Atuarfik Mathias Storch iluarsartuunneqarluni.