Oqartussaaffinnik tigusinissap qanoq kinguneqassanersoq ilisimaneqanngitsoq

Namminersortunngornissat Siumut ataatsimeersuarnissaata tungaanut ataatsimeersuarnermilu oqallinnerni initusimagaluaqaaq. Qaqugulu naalagaaffeqatigiinnerup ataaniikkunnaarluni naalagaaffinngornissaq isummerfigisassanut ilaagaluarpoq.

Apeqqulli taanna akineqanngikkallarpoq, taarsiullugulu immikkoortortaqarfiit ukiumi tulliuttumi tamatuminnga oqallisissapput.

Aalajangiunneqarporli – Namminiilivinnissamik oqalukkunnaarluni naalagaaffinngornissamik oqalulernissaq.

Qanoq kinguneqassanersoq ilisimaneqanngitsoq

Namminiilivinnissaq eqqarsaatigalugu ulluliinissap oqallisigineqarnissaa politikerinit nuimasunit, soorlu Vittus Qujaukitsumit aamma Suka Frederiksenimit ujartorneqarnikuuvoq.

Ataatsimeersuarnermili qaqugu namminiilivittoqassanersoq Siumut ulluliinngilaq. Tamatumunnga pissutaasoq tassaavoq; Nunatta oqartussaaffiit Danmarkimit tigussagunigit Nunatsinnut qanoq kinguneqassanersoq ilisimaneqanngimmat.

Siumup politikkikkut anguniagassaatut aalajangiiffigisat ilaat tassaavoq nunatta imminut napatissinnaalernissaanut tunngasoq. Tassani aalajangiunneqarput Siumut Inatsisartutigut naalakkersuinikkullu aalisarnerup iluani siuarsaanissamik ujartuisoqassasoq taamatullu ilinniartitaanerup iluani qaffassaasoqassasoq.

Mittarfiit marlunnillu atuuffeqarneq

Tassunga atatillugu Nunatta aaqqissuussaaneranut pillugu aamma Siumut aalajangiussivoq. Tassa Ilulissani, Nuummi Qaqortumilu mittarfissualiortoqarnissaa kiisalu illoqarfinni minnerusuni, soorlu; Qasigiannguani, Uummannami allanilu mittarfinnik minnerusunik pilersitsisoqarnissaa Siumut siunniuppaa.

Maluginiagassat ilaat tassaavoq Siumumi politikerit marlunnik atuuffeqartarneri atorunnaarsinneqarpoq. Tassa partii sinnerlugu qinikkat maanna folketingimi, Inatsisartuni kommuniniluunniit qinikkatut akuleriissitsillutit issiasinnaajunnaarput. Tamannalu Inatsisartunut qinersinissap tullianit atuutilissaaq.