Oqarasuaatikkut siunnersuisarfiit ammasarfii sivitsorneqartut
Meeqqat Pisinnaatitaaffii pillugit Naalagaaffiit Peqatigiit Ataatsimiititaliaata kaammattuuteqarneratigut, meeqqat, inuusuttut inersimasullu erloqinartorsiortut allanilluunniit pissuteqarlutik tapersersorneqarnissamik siunnersorneqarnissamillu pisariaqartitsisut, oqarasuaatikkut siunnersorneqartarnerannut ammasarfiit sivitsorniarlugit naalakkersuisut 1,4 millionit koruuninik immikkoortitsipput.
Oqarasuaatikkut siunnersuisarfiit sapaatip-akunnerisa ulluisa tamani ualikkut nalunaaqutaq sisamaniit unnukkut qulit tungaannut ammasarnissaat anguniarneqarpoq:
- Nunatsinni sumiiffinni, pingaartumik nunaqarfinni illoqarfinnilu minnerusuni, ilinniarsimasunit tapersersorneqarluni siunnersorneqarlunilu oqaloqateqarnissaq killeqartupilussuuvoq.
Oqarasuaatikkut siunnersuisarfiit ammasarfiisa sivitsornerisigut tapersersuinissamullu neqeroorutit nutaat pilersinnerisigut isumaginninnermi suliniuteqartut pingaartumik isorliunerusuni nakussatsinnissaat kissaatigaarput, Isumaginninnermut naalakkersuisoq Sara Olsvig oqarpoq.
Oqarasuaatikkut siunnersuisarfiit immikkoortortaqarfinni assigiinngitsuniittut Isumaginninnermut Naalakkersuisoqarfiup ataani Isumaginninnermut Aqutsisoqarfimmi siunissami ataatsimut aamma katersorneqassapput:
- Taamaliornikkut ingerlatsinermi iluaqutissat oqarasuaatikkullu siunnersuisartut suliaqartarnermikkut pikkoriffiisa pitsaanngorsarnissaat pilersinneqassapput, Naalakkersuisut nittartakkaminni taama ilaatigut allaaserisaqarput.
Ullumikkut oqarasuaatikkut siunnersuisarfiit tassaapput ATTAVIK146 inunnut imminornissaminnik eqqarsaateqartunut, Meeqqat inuusuttuaqqallu oqarasuaataat 134, Ilaqutariinnut siunnersuisarfik 31 41 51, Inersimasunut kinguaassiutitigut atornerlunneqarneq pissutigalugu kingunerlutsitsisunut siunnersuisarfik 141 aamma MIO SMS 1899.