Oqallinnermi malittarisassat allanngussanersut misissorpaat

Inatsisartut oqallittarneranni malittarisassat allanngortinneqassanersut pillugit inatsisartut siulittaasoqarfiat paasiniaasussanngorpoq.

 Oqallinnermi maleruaqqusat misissuiffigineqarnissaat pisariaqalerpoq Demokraatineersup Per Berthelsen-ip inatsisartut siulittaasuata tullia Aqqaluk Lynge naammagittaaliutigimagu, sapaatip akunnerata uuma siuliani oqallinnermi aqutsisuutillugu Per Berthelsen nipangersittariaqalermagu.

 Taamanikkut oqallinnermi inuiannik ikinnerussuteqartunik nungusaaniarnertut nipilimmik oqallinneq akoqartinneqalersoralugu Aqqaluk Lynge nipangersitsivoq.

 Nipangersitaanini pillugu Demokraatit siulitaasuat utoqqatserfigineqanngitsoorpoq, landstingimilu atorfilittat isumaqarput, Aqqaluk Lynge killissaminik qaangiisoq, Per Berthelsen oqaluttarfimmi oqaluttoq nipangersikkamiuk.

 Inatsisartut suleriaasiat pillugu ataatsimiitsitaliaq malittarisassat allanngortinneqassanerinik misissuisussanngorpoq.

 -Inatsisartut ataatsimiitarfiani pisut ataatsimiitsitaliami nalilersorneqartuarput, pineqartorlu aamma suliassanut ilannguppoq, inatsiartut siulittaasuat Jonathan Motzfeldt oqarpoq.