Avalak: - Oqaatsit marluutillugit pisariaqartippagut
Atorfinitsitsineq sulisullu pigiinnarnissaat pillugit nassuiaammut missingiutip KNR-imit sammineqarneranut atatillugu kalaallisut oqaatsivut kikkullu kalaaliviunerat oqallisaalerpoq.
Nassuiaammi apersuinerit tunngavigalugit oqaatigineqarpoq kalaallisut oqaatsitsinnik atuisinnaannginneq pissutigalugu ilinniartut imaluunniit nunanit allanit suliartortut Nunatsinni tikilluaqqusaanngitsutut misigisartut, kiap "kalaaliviuneranut" kalaallisut oqaatsivut aalajangiisuutinniarneqartarmata.
AAMMA ATUARUK Kinaassusermut aporaarnerit Nunatsinnit nuutsitsisartut
Nassuiaammut missingiut KNR-ip pissarsiarisimasaa atuareerlugu Avalammi siulittaasoq KNR-imut mailikkut allappoq kalaallisut danskisullu oqaatsit marluutillugit akuerineqartariaqartut:
- Ilinniarnissatsinnut periarfissaqassagutta, oqaatsit taakku marluutillugit pisariaqartippagut, Avalammi siulittaasoq Marie Kahlig taama allappoq.
Ataasiakkaat tunniussinnaasaat isiginiarneqarlik
Taanna isumaqarpoq Nunatsinni kulturit arlariit maanna atugaareersut, inuiaqatigiillu pitsaanerusumut ineriartortinnissaannut nukiit tamaasa pisariaqartinneqartut:
- Ataasiakkaat inuiaqatigiinnut tunniussinnaasaasa suleqatigiissutigineqarsinnaasullu pingaarnerutinneqarnissaat kattuffiup tungaanit neriuutigaarput, Marie Kahlig taama allappoq.
AAMMA ATUARUK Oqaatsit pillugit oqallinnermi attaveqaqatigiinnissaq ujartorneqartoq
Siulittaasoq isumaqarpoq politikerit ilinniartitaanerup nukittorsaavigineqarnissaa sapinngisartik tamaat sulissutigisariaqaraat amerlanerusullu tassuuna tunniussaqarnissaannut periarfissillugit:
- Meeqqat pillugit isumaqatigiissutip eqqortinneqannginnera Miop nalunaarusiamini uparuarpaa. Aamma Namminersorlutik Oqartussat ilinniartitaanermut tunngatillugu nalunaarutaata ersersippaat meeqqat atuarfiat sanngeequteqartoq. Tamakkulu inuiaqatigiinni atuakkatsinnut sunniuteqarput, Marie Kahlig taama allappoq.
Avalaap siulittaasua naapertorlugu, tamakku aamma kalaallinut Danmarkimi ilinniagaqartunut sunniuteqartarput, ilaatigut ilinniakkamik taamaatitsiinnartoqartarluni naammaginartumik piareersarneqarsimannginneq pissutigalugu.
