Oqaaseqartartut arlallit iseqqinngitsoorput
Kalaallit Nunaannut tunngassuteqartunik oqaaseqartartut tamangajammik Folketingimut 2011-mi qinersinermi inuulluaqquneqarput. Oqaaseqartartut partiinit arfineq-marlunnit peerput. Amerlanerit namminneq kajumissuserinngisaminnik.
Enhedslistenimeersoq Line Barfod tunuartariaqarsimavoq, partii isumaqarmat ukiut arfineq-marluk sinnerlugit Folketingimi ilaasortaasoqartariaqanngitsoq. Line Barfod Kalaallit Nunaata Danmarkillu Namminersorneq pillugu Isumalioqatigiissitaani ilaasortaasimavoq, SF-imeersoq Kristen Touborg ilaatigut peqatigalugu. Kristen Touborg uani qinersinermi aamma iseqqinngitsoorpoq. SF-mut ilaasortat arfineq-marlunnik ikileriarput.
72-inik ukiulik, misilittagalissuaq, Radikale Venstreneersoq, Niels Helveg Petersen, qinigassanngorteqqiniarnani aalajangersimavoq. Namminersorneq pillugu Isumalioqatigiissitami aamma ilaasortaasimavoq, Christiansborgimilu ukiuni 36-ni sulinermini Kalaallit Nunaannut tunngassuteqartunik sammisaqarluarsimalluni.
Kalaallit Nunaannut tunngassuteqartunik Venstremiit oqaaseqartartup, Flemming Møllerip, qinersinerit kisinneqareermata tunuartariaqarluni aamma paasivaa.
Aamma Per Ørum Jørgensenip, Kristendemokratinut 2010-mi nuunngikkallarami, Kalaallit Nunaannut tunngassuteqartunik Konservatiniit oqaaseqartartuusup, qinersisartut killissinnaasimanngilai. Ørum Isumalioqatigiissitami aamma ilaasortaasimavoq. Per Ørum Jørgensen Kristendemokratinut ilaasortanngormat Tage Leegaard Kalaallit Nunaannut tunngassuteqartunik Konservatini oqaaseqartartunngorpoq. Sisamanngormalli qinersinermi taanna aamma iluatsitsinngilaq.
Dansk Folkepartimi oqaaseqartartoq, Henrik Brodersen, Christiansborgimut aamma isinngitsoorpoq. Taannali suli ilungersorpoq. Lollandimi Søllestedimi kisitsinermi kukkusoqarsimanerarlugu kisitseqqittoqarnissaa taassuma piumasaraa.
Socialdemokraatit Liberal Alliancellu Kalaallit Nunaannut tunngassuteqartunik oqaaseqartartui, Mogens Jensen aamma Villum Christensen, kisiartaallutik qinigaaqqipput.
