Illersuisumik pilersitsiniarneq neriulluarfigineqartoq
- Qanoq inerneqarnissaa paasissallugu assorujussuaq pissangalluta utaqqivarput, innarluutillit kattuffianni, KNIPK-mi, siulittaasoq Hans Reimer oqarpoq.
Nunatsinni innarluutilinnik sullissineq pitsaanngilaq. Naalakkersuisut misissuisitsimmata tamanna siorna inerniliunneqarpoq.
Ilaatigut aamma allaaserineqarpoq innarluutilinnut inatsit ullutsinnut naapertuutinngimmat nutarsarneqartariaqartoq, kommunit sulisunik ilinniarsimasunik inuttassarsinissaq ajornakusoortikkaat taavalu aamma Naalagaaffiit Peqatigiit Innarluutillit pillugit Isumaqatigiissutaannik naammassinnissinnaanngitsut.
FN-ip Inuit Innarluutillit pillugit Isumaqatigiissutaa Danmarkimi 2009-mi atuuttussanngortinneqarpoq, nunatta peqataaffiginngitsuunngisaanik.
Tassalu isumaqatigiissut nunatsinnut aamma atuuppoq. Inatsisartut FN-imi isumaqatigiissut 2012-imi atuutilersippaat.
Sullissineq unammillernartoqartoq
Innarluutillit pillugit nalilersuinerup, apriilimi saqqummersup, takutippaa innarluutilinnik sullissineq unammillernartortaqartoq.
- Innuttaasunut kiffartuussiviit, alloriarfiit assigiinngitsut eqqarsaatigalugit, unammilligassaqarput, assigiinngiiaartunik piginnaasaqarlutik. Tamatumali nassatarisaannik amigartumik kiffartuussisarlutik. Innuttaasut inatsisinit illersugaanissaat qarsupittumik isumagineqartarpoq, ingammillu naammagittaalliuteqarnissamut periarfissat tungaasigut minnerunngitsumillu sulisut taarseraattarnerat aporfissat anginersaralugu, nalilersuinermi allapput.
AAMMA ATUARUK Oqaaseqartartoq nutaaq pisinnaatitaafinnik kivitsissaaq
KNIPK-llu tamanna ilisarisinnaavaa:
- Kattuffik aasarmanna 2016-imi angalanerani paasinarsivoq atugassarititaasut kommunini assigiinngimmik atorneqartut, siulittaasoq oqarpoq.
Pitsaasumik alloriarnerusoq
Innarluutillillu pisinnaatitaaffii patajaallisarniarlugit Naalakkersuisut, meeqqat illersuisoqarnerat assigalugu, innarluutillit pisinnaatitaaffiinik illersuisussamik pilersitsinissamik siunnersuuteqarput.
Tamannalu pitsaasumik alloriarnerusoq, KNIPK isumaqarpoq.
Tassami aningaasanik iliuusissanillu aallaqqaammut kinguneqartariaqanngilaq, innarluutillilli tunngaviusumik pisinnaatitaaffiisa qulakkeernissaannut tunngalluni. Tassalu innarluutillit illersuisuata tamanna oqallisigilersissinnaagaa, Hans Reimer isumaqarpoq.
- Soorlu Meeqqat Illersuisuata angusai nuannaartunartumik ingerlanneqarput, aamma neriuuteqarfigigatsigu innarluutillit illersuisoqalerpata aamma taassuma angusai kusanarluinnartumik saqqummiunneqartalissasut, Hans Reimer oqarpoq.
Innarluutillit illersuisuannik pilersitsiniarneq nunatsinni ineriartornermikkut kinguarsimasunut angajoqqaajusut peqatigiiffianni Inooqammi siulittaasup, Benny Kokholmip, aamma nuannaarutigaa.
Naalakkersuisut aningaasanut inatsimmi innarluutillit illersuisuannik pilersitsinissamut atorneqartussanik 2,5 millionit koruuninik illuartitsereerput.
Inatsisissatut siunnersuut marlunngornermi siullermeerlugu oqaluuserineqassaaq.
