Isertortumik paasiniaasarfik: Issittumi suleqatigiinneq sakkutuunik amerlisaanermit aporfilersugaasoq
Issittumi sikuerukkiartornerani nunat amerlanerujartuinnartut tamaani soqutigisaqaleriartortillugit tamaanilu pissaqarneruleriartortillugu sillimaniarnikkut pissutsit ilarussuukkaluttuinnarput.
Issittumi ineriartorneq nunat Issittumut sineriallit suleqatigiinnerannik ataatsimut isigalugu malunnaateqartoq Illersornissaqarfiup isertortumik paasiniaasarfia nalunaarusiamini allappoq.
Kisianni ingammik Rusland tamaani sakkutuuminik amerlisaavoq. Tamatumalu nunat sinneri akillutik sakkutuuminnik amerlisaapput, taamaaliornerullu Issittumi sakkutuulersorfiunngitsumik suleqatigiinneq ilungersunartorsiortissavaa.
AAMMA ATUARUK Ministerip sakkutooqarnikkut annertusaaneq erseqqarinngitsumik akissuteqarfigigaa
Ruslandip Issittumi sakkutooqarneruleriartornera avannamut killeqarfimminik illersuiniarnerusoq, Isertorlutik paasiniaasartut nalunaarusiaminni allapput.
Sakkutooqarneruleriartornermili atortut ilaat aamma saassussissutaasinnaasunik ilaqarput.
Ruslandip sakkutooqarfimmik qalasersuarmiit nunatsinniillu 1000 kilometerisut ungasitsigiinnartumiittumik allilerinera nalunaarusiami immikkut taaneqarpoq.
- Sakkutooqarfimmiit tassanngaanniit russit timmisartui sorsuutit Kalaallit nunaata kangianut imaalitsiaannaq pisinnaapput. Timmisartut akersuussutit silaannarmi orsersorsinnaagunik Pituffimmi sakkutooqarfik, Amerikamiut qaartartunut avungarsuaq igeriuttakkanut illersornerannut pingaaruteqartoq, angusinnaavaat, isertortumik paasiniaasartut nalunaarusiami allapput.
AAMMA ATUARUK Ruslandip Issittumi sakkortooqarnikkut annertusaanissaa Samuelsenip mianersoqqussutigigaa
