Ombudsmandi: Tarnikkut nappaatillit pillugit allakkat malittarisassanik uniuinerupput
Namminersorlutik Oqartussat inissiaataanni tarnikkut nappaatilinnik Kommuneqarfik Sermersuup ineqartitsisassanngitsoq, Ineqarnermut Naalakkersuisoqarfik kommunimut allagaqarsimasoq, KNR-ip septembarimi oqaluttuaraa.
Taama pisoqarmat Inatsisartut Ombudsmandia suliamut akuiliuppoq.
Tarnikkut nappaatilinnut inissianik kommuni inersuussisarunnaaqqullugu Namminersorlutik Oqatrtussat allagaqarnerat malittarisassanut naapertuutinngitsoq, ombudsmandip oqaaseqaataani allassimavoq.
- Ineqarnermut Naalakkersuisoqarfiup nalunaarutaa paasinninnera naapertorlugu suliat tunngavigalugit aqutsinissamut malittarisassanik, naalakkersuisoqarfiup malittassaanik erseqqissumik uniuinerupput.
Ombudsmandi oqaaseqaatimini, taassuma nittartagaatigut saqqummiunneqaqqammaersumi, allappoq.
AAMMA ATUARUK Inissiami nalinginnaasumi najugaqarsinnaaneq inuttut pisinnaatitaaffiuvoq
Ineqarnermut naalakkersuisoqarfimmit, taamaalillunilu naalakkersuisumit akisussaasumit Sivert K. Heilmannimit allakkat ombudsmandi naapertorlugu tamakkiisumik isigigaanni isornisariaqarput.
Ombudsmandip inersuussutigaa, Ineqarnermut Naalakkersuisoqarfiup allakkamini oqaasertaliussat, KNR-ip allakkat saqqummiutereeraalu aamma inuit pisinnaatitaaffii pillugit ilisimatusarfiup Københavnimiittup naalakkersuisoqarfik isornartorsiorujussuareeraalu, septembarimi ombudsmandimut allagaqarnermini allanngortimmagit.
Ombudsmandi naapertorlugu Naalakkersuisoqarfimmiit Ombudsmandimut allakkani erserpoq, innersuussinissamut pisinnaatitaaffik tigussaasumik atorneqartussaasoq aammalu suliamit inatsisinillu tungaveqartussaasoq, naaalakkersuisoqarfik ilisimaarinnittoq.
Inuttut Pisinnaatitaaffiit pillugit ilisimatusarfimmit isornartorsirneqarpoq
Suliaq spetembarimi sammineqaleruttormat, inuit pisinnaatitaaffii pillugit ilisimatusarfimmi inatsisilerutooq, Maria Ventegodt Liisberg KNR-imut oqarpoq, kikkut tamat naligiimmik inissaqartitaanissamut pisinnaatitaaffeqartut, malittarisassat taamaammata.
Aamma erseqqissarpaa, timikkut tarnikkulluunniit innarluuteqarnersutit immikkoortineqartussaanngitsoq.
Tamannalumi ombudsmandip aamma tunngavilersuutigaa, maluginiarlugulu inissiat naqqaarliit pineqarmata, taakkualu aalassarluttunut iluaqutissanngortillugit attartortinneqartartut. Aalassarluttulli taakkua aamma tarnikkut innarluuteqarpata, taamaannerat inissianik attartornissaannut akornutaassanngitsoq. Kisiannili aamma tamakkunani malittarisassat atuuttut tamani malinneqassallutik.
Ombudsmandip aamma tikkuarpaa, Kommuneqarfik Sermersooq innuttaasunut tarnikkut nappaateqartunut pisariaqartitsisunut ikiuunnissamut pisussaaffeqarmat.