Olsvig: Tartupaluk Inuit Nunaattut isigineqalerli
Issittoq pillugu Aarhusimi ataatsimeersuarnermi canadamiup danskillu ilisimatuut siunnersuutigaat Tartupaluk pillugu akerleriinneq unitsillugu qeqertaq Canadap Naalagaaffeqatigiillu ataatsimut pigisariaqaraat.
Tamanna nalunaarusiornikkut pissasoq - ilisimatuut "Aarhusimit nalunaarusiamik" atsereersimagaluarpaat.
Siunnersuutigineqartorli pillugu ataatsimeersuaqataasoq Sara Olsvig allaanerusumik siunnersuuteqarpoq.
Aamma atuaruk Ilisimatuut: Tartupaluk Nunavut Kalaallit Nunaatalu ataatsimoorullugu piginiarlissuk
- Tartupaluk pillugu akerleriinneq soorunami nunat akornanni attaveqatigiilluarnikkut aaqqiivigineqassaaq.
- Qeqertarli taanna kalaallisut Tartupalummik atilik eqqartussagaanni naalakkersuisut issittumiittut avaqqullugit eqqartorneqarsinnaanngilaq. Tassalu Kalaallit Nunaat aamma Nunavut.
- Taamaattumik siunnersuuteqarpunga qeqertaq taanna pillugu aaqqiissuteqassagutta, taava imaannginnerpa siullersaalluta pisussaasugut oqassalluta qeqertaq taanna inuit nunagigaat? Tassuuna naalagaaffiit killeqarfii allatorluinnaq eqqartorneqalissapput.
Aamma atuaruk ASSIT Tartupaluk pillugu siunnersuut nuannaarutigineqarlunilu quiasaarutigineqartoq
- Issittup isorartunerujussua nassuerutigalugu immitsinnut taasarpugut Inuit Issittormiut, tassaallutalu naalagaaffiit killeqarfii akimorlugit inooqatigiittut.
Ataatsimmersuarnermi oqallisigineqartut uani takusinnaavatit.
Danskeq ilisimatooq Michael Böss siunnersuuteqaqataasoq, KNR-imut erseqqissaavoq, Tartupaluk Issittumi nunanit namminersortunit aqunneqassasoq, Danmarkimit Canadamillu pinnani.
- Siunnersuutigisatsinni qitiussaaq qeqertaq Kalaallit Nunaannit Nunavumillu aqunneqartariaqartoq.
Sara Olsvigip siunnersuutaa tassa Tartupaluup Inuit Nunaattut isigineqalernissaatut; siunnersuuteqaqqaartup aappaanit canadamiumit professor Michael Byersimit taperserneqarpoq.
Aamma atuaruk Canadamiup Tartupaluk tunniukkusuppaa
Professori isumaqarpoq Kalaallit Nunaata ICC peqatigalugu siunnersuut FN-imut ingerlateqqissagaat.
