Olsvig: Kuannersuarni aatsitassarsiortoqalissappat IA-p akerlilersornavianngilaa
Sara Olsvigilli KNR-imut oqarpoq, Kuannersuarni piiaalernissaq akuersissutigineqassagaluarpat, tamanna Inuit Ataqatigiit partiitut akerlilersornavianngikkaat.
- Soorunami innuttaasut isumaat tusarniarniaraanni tamanna tusaaniarneqassaaq. Taamaammanun oqartugut, innuttaasut isumaat toqqammavigalugu Inatsisartunngorumaartussat tassaassapput aalajangiisussat, tamannlu tassa Inuit Ataqatigiinniit ataqqisassarput, Sara Olsvig KNR-imut oqarpoq.
Taassuma aviisimut Politikenimut oqaatigaa, innuttaasunik taasisitsinissaq Inuit Ataqatigiinnit tapesersorneqarmat Kuannersuarnili aatsitassarsiornissamik pilersaarut allarluinnartut isigineqartariqarnerarlugu.
Kuannersuarni aatsitassarsiornissap pilersinneqarnerani, Kujataani inuussutissarsiorneq killuup tungaanut ingerlalersinnaasoq, Sara Olsvigip annilaanngatigaa, taamaammallu Kuannersuarni pilersaarut isumaqatigisinnaanagu oqaatigalugu. Inuussutissarsiornerli allatut aaqqiissuteqarfigineqartariaqartoq, Sara Olsvig isumaqarpoq.
- Inuit Ataqatigiinniit qiningaaffimmi aggersumi, Kujataani inuussutissarsiornikkut ineriartortitsinissaq immikkut sammerusupparput. Siullermik suliffeqarfiit namminersortutut ingerlasut aporfeerarpassui piiarlugit aamma nalikilliliinermut malittarisassat qiviaqqillugit aaqqissuunnissaat anguniassallutigu, taamatullu Kujataani immikkut sammisaqarnikkut ineriartortitsinissap ingerlalluarnerunissaa anguniarusupparput, Sara Olsvig oqarpoq.
Inuit Ataqatigiit siulittaasuata uranimut naaggaarluinnarnerup atorunnaarsinneqarsimanera inuiaqatigiinnut taasissutigitinniagaa, sulisartut kattuffiannit, SIK-mit isornartorsiorneqarpoq oqalutik, neriuutigalugu inuiaqatigiinnut tamanna taasissutigitseqqinneqassanngitsoq. Jess G. Berthelsen nangilluni ima oqarpoq.
- Narsami aatsitassarsiorfissaq ukiut tallimat qaangiuppata piareersinnaavoq. Tamannalu kinguarteqqinneqassappat, ernummatigaarput suliffissaaleqinerup suli annertunerulernissaa. Taamaattumik aatsitassarsiorfissaq suliffissaaleqinerup akiorneqarnissaanut pingaaruteqarpoq, tassami Kuannersuarni aatsitassarsiorfik aallartinneqarpat tamanna sinerissami tamarmi suliffissanik aamma pilersitsisinnaammat.
SIK-p siulittaasuata, Jess G. Berthelsenip aamma tupigusuutigaa, Inuit Ataqatigiit siulittaasuata, Inatsisartut urani pillugu taasissutigeriigaat ataqqinngimmagu, oqarluni tamanna demokratii aallaavigalugu taasissutigitsinneqareermat allanngortinneqarnissaa pisariaqanngitsoq.
