Ole Dorph qinigassanngortinngitsoq

Qaasuitsup Kommuniani borgmesteri Ole Dorph apriilip ulluisa sisamaanni kommunimut qinigassanngortinngilaq.
Assi © : KNR
februaarip 23-at 2017 10:24

Politiiusimasoq kingusinnerusukkullu inuussutissarsiornermi ingerlataqartoq, Ole Dorph, apriilip ulluisa sisamaanni kommunimut qinersinermut qinigassanngortinngilaq. Qaasuitsup Kommunianut qinigassanut allattorsimaffimmi kommunip nittartagaani saqqummiunneqartoq tamanna takuneqarsinnaavoq.

Ole Dorphilu qineqqusaalinngitsoq Siumup Qaasuitsup Kommuniata allaffiani atorfilittap tamanna KNR-imut aamma uppernarsarpaat.

AAMMA ATUARUK Ilisimaneqarluartut Sermersuumi qinigassanngortittut

Taamaalillunilu Ole Dorph decembarip ulluisa 31-anni borgmesteriujunnaassaaq. Qaasuitsup Kommuniata avinneqarnissaa pissutigalugu ikaarsaariarnermi ataatsimiititalianut qinersisoqartussaammat ukiup naanerata tungaanut borgmesteriussaaq.

Naalakkersuisunut ilaasortaasimasoq

Ole Dorph Qaasuitsup Kommuniani maannakkut ukiuni sisamani borgmesteriuvoq, siornatigulli Ilulissat Kommuniani arlaleriarluni borgmesteriusarluni.

Ole Dorph politikeritut misilittagaqartuuvoq, aamma naalakkersuisuusimalluni ilaatigut isumaginninnermut akisussaaffeqarluni.

Ole Dorph politiitut ilinniagaqartuuvoq, kingornali takornariaqartitsinermi ingerlataqarluni, ilaatigullu umiarsuaatileqatigiiffimmi Disko Linemi piginneqataasuulluni.

KNR-ip Ole Dorph oqaaseqartinniarlugu attaviginiarsaraa

Qeqqata Kommuniani borgmesteri, Hermann Berthelsen, aamma qinigassanngortittunut ilaanngilaq.

AAMMA ATUARUK Hermann Berthelsen sassaqqissanngilaq